Алматыдағы Сайран көлінде шығыс және батыс жағалауларды жалғайтын понтонды көпір уақытша жабылды. Бұл шектеу қатты жауын-шашыннан кейін су деңгейінің көтерілуіне байланысты, деп хабарлайды Almaty.news ақпарат агенттігі.
«Жасыл Алматы» коммуналдық кәсіпорнының хабарлауынша, қатты жаңбыр салдарынан қала өзендеріндегі су деңгейі айтарлықтай көтеріліп, соның ішінде Үлкен Алматы өзені арнасымен Сайран көліне құятын су ағыны да артқан. Су ағынымен бірге көлге бұтақтар, ағаш қалдықтары, тұрмыстық қоқыс және басқа да шөгінділер түскен, бұл жағдайды қиындата түскен.
— Қауіпсіздік мақсатында понтонды көпірге кіру уақытша жабылды. Бұл су деңгейі төмендегенше және құрылымның техникалық жағдайы тексерілгенше қолданылатын профилактикалық шара, — деп хабарлады кәсіпорын.
Компания өкілі Аслан Мұхамеджан понтонды көпірді монтаждаудың неге созылғанын түсіндірді. Оның айтуынша, бірінші мәселе Сайранның өзін сумен толтыруға байланысты болған. Белгілі бір деңгейге жетіп, көлді толтырғаннан кейін понтонды көпірді жинау жұмыстары басталған. Жұмыстарды мердігер ұйым орындайды. Ауа райы тұрақталған кезде олар монтажды аяқтауы керек.
Сонымен қатар, жағалау сызығының бір бөлігінде габионды құрылымдарды нығайту жұмыстары жалғасуда. «Жасыл Алматы» КММ мамандары көл акваториясы мен жағалау аумағын су әкелген бұтақтардан, тұрмыстық қоқыстан және басқа шөгінділерден тазартуда. Кәсіпорын жағдайдың тұрақты бақылауда екенін, су деңгейі тұрақтанғаннан, барлық қажетті жұмыстар аяқталғаннан және құрылымның қауіпсіздігі расталғаннан кейін понтонды көпір қайта ашылатынын жеткізді.
Дереккөз: Inform.kz