Алматы тауындағы Сәтпаев шыңына шыққан екі қыз белгіленген уақытта оралмай, байланысқа шықпай қалған, деп хабарлайды Almaty.news ақпарат агенттігі.
Өткен түні «112» пультіне 2007 және 2008 жылғы екі қыздың Сәтпаев шыңына шығып, белгіленген уақытта қайтып оралмай, байланысқа шықпай қалғаны туралы хабарлама түскен. Соңғы рет олардың орналасқан жері күндіз шың маңында тіркелген.
Іздеу-құтқару жұмыстарын жүргізу үшін ҚР ТЖМ «Барыс» республикалық жедел-құтқару жасағының қызметкерлері Алматы қалалық ТЖД Құтқару қызметімен бірге дереу жолға шықты. Үлкен Алматы көлі ауданына жетіп, құтқарушылар Сәтпаев шыңы бағытындағы биік таулы маршрутты тексеруге кірісті.
«Іздеу-құтқару жұмыстары барысында туристер теңіз деңгейінен 4317 метр биіктікте, Сәтпаев шыңы жанындағы кемпинг ауданынан табылды. Олардың орналасқан жері анықталғаннан кейін құтқарушылар қыздарды қауіпсіз жерге дейін алып жүрді», — делінген құтқарушылар хабарламасында.
Іздеу-құтқару операциясы сәтті аяқталғаны атап өтілді — туристерге медициналық көмек қажет болмады.
Дереккөз: Nur.kz