Алматы қаласының ТЖД тұрғындарға сел қаупі туралы ескерту жасап, тауға саяхаттаудан бас тартуды ұсынды, деп хабарлайды Almaty.news ақпарат агенттігі.
4 шілдеде Алматыда қысқа мерзімді жаңбыр, найзағай және екпінді жел күтіледі. Жел батыстан, екпіні 15–20 м/с жетеді. Іле Алатауының таулы аудандарында (Медеу және Бостандық аудандары) жаңбыр, найзағай, кей жерлерде қатты жаңбыр, бұршақ және екпінді жел болжанады. Жел батыстан, солтүстік-батыстан, екпіні 15–20 м/с, күндіз кей жерлерде 23–28 м/с дейін жетеді.
Қатты жауын-шашын болжамына байланысты 4–5 шілде аралығында таулы жерлерде сел көріністерінің ықтималдығы сақталады, — делінген ведомство хабарламасында.
ТЖД қала тұрғындары мен қонақтарына қауіпсіздік шараларын сақтауды, дауыл ескертуі кезінде тауға бармауды, көліктерді ағаштардың астына қоймауды, әлсіз бекітілген құрылыстардың астында болмауды және ресми құтқару қызметтерінің хабарламаларын қадағалауды ұсынды.
Дереккөз: Nur.kz