Алматыда 45 мың көрерменге арналған жаңа футбол стадионының құрылысы жалғасуда. Нысан Күлжа мен Талғар трактілерінің ауданында бой көтеруде, деп хабарлайды Almaty.news ақпарат агенттігі.
Қалалық құрылыс басқармасының басшысы Нұрбол Нұрсағатов аймақтық коммуникациялар қызметінің брифингінде жобаны іске асыру үшін шамамен 32 гектар жер телімі бөлінгенін мәлімдеді.
Қазіргі уақытта болашақ стадион аумағында құрылыс жұмыстары белсенді жүргізілуде. Жоба спорт инфрақұрылымына қойылатын заманауи талаптарды ескере отырып жүзеге асырылуда және әртүрлі деңгейдегі жарыстарды қабылдай алатын көпфункционалды кешен құруды көздейді.
Жаңа арена УЕФА-ның төртінші санатының талаптарына сәйкес болады. Бұл халықаралық деңгейдегі матчтарды, сондай-ақ ірі спорттық іс-шараларды қабылдауға мүмкіндік береді.
Негізгі футбол аренасынан басқа, жоба жаттығу алаңдарын, спортшылар мен командаларға арналған заманауи үй-жайларды, жанкүйерлерге арналған аймақтарды, қауіпсіздік жүйелерін және іргелес аумақты кешенді абаттандыруды қамтиды.
Жобаны іске асыруда тасымал қолжетімділігіне ерекше назар аударылады. Стадионның ірі қалалық магистральдарға жақын орналасуы жаңа спорт нысанын мегаполис көлік жүйесіне интеграциялауға мүмкіндік береді. Жоба аясында іргелес жол инфрақұрылымын дамыту да көзделген, бұл стадионға ыңғайлы кіреберісті және ірі іс-шаралар өтетін күндері көлік ағындарын тиімді ұйымдастыруды қамтамасыз етуі тиіс.
Бұған дейін жаңа футбол стадионының құрылысын 2028 жылдың көктемінде аяқтау жоспарланғаны хабарланған еді.
Дереккөз: Inform.kz