Алматыда бақылау шараларының қорытындысы бойынша төрт құрылыс компаниясы лицензиясынан айырылды, тағы 350 компанияның лицензиясының қолданысы тоқтатылды, деп хабарлайды Almaty.news ақпарат агенттігі.
Сондай-ақ, құрылыс қызметінің 437 субъектісіне қатысты шаралар қабылданды. Әлеуметтік нысандардың құрылысымен айналысатын мердігер ұйымдарға ерекше назар аударылды.
Мәселен, «SK BEST Spec Story KZ» ЖШС I санатты жобалауға арналған мемлекеттік лицензиясынан айырылды. Сонымен қатар, «Отау-Құрмет» ЖШС, «ДО АО „КазНИИСА“» ЖШС лицензияларынан айырылды, ал «Сәулет Құрылыс Консалтингі» ЖШС лицензиясының жекелеген түрінен айырылды.
Қалалық қала құрылысын бақылау басқармасы біліктілігін растай алатын, белгіленген талаптарды сақтайтын және құрылыстың тиісті сапасын қамтамасыз ете алатын компаниялар ғана жұмыс істей алатынын атап өтті.
Салыстыру үшін, өткен жылдың қорытындысы бойынша сегіз құрылыс компаниясы лицензиясынан айырылған болатын, олардың көпшілігі де әлеуметтік нысандардың құрылысымен айналысқан.
Бұған дейін бірқатар құрылыс ұйымдарының, оның ішінде «Құрылысшы — ТБС» ЖШС, «AsiaMax» ЖШС, «СК 7 строй» ЖШС, «Аркада KZ» ЖШС, «Алатау сапа курылыс» ЖШС лицензияларынан айырылғаны хабарланған болатын.
Дереккөз: Inform.kz