Алматыда кардиохирургиялық операциялардың саны алты жыл ішінде екі еседен астамға өсті, деп хабарлайды Almaty.news ақпарат агенттігі.
Алматы қалалық кардиологиялық орталығының директоры Ермағамбет Қуатбаевтың айтуынша, бүгінде мекеме елдегі ең ірі бейінді медициналық орталықтардың бірі саналады. Мұнда жыл сайын 40 мыңнан астам адам амбулаториялық тексеруден өтеді, тағы 11 мыңға жуық науқас стационарлық көмек алады. Орталықтың төсек қоры 290 орынды құрайды.
Мамандар жыл сайын 6 700-ге жуық ангиография, 3 000-ға жуық коронарлық артерияларды стендтеу операциясы, 500-ден астам ашық жүрекке ота және 1 000-нан астам интервенциялық аритмологиялық процедура жасайды.
— Біздің орталық жүрек-қан тамырлары аурулары бар науқастарға көмектің толық спектрін ұсынады. Бізге Алматы тұрғындары, Қазақстан өңірлерінің тұрғындары, сондай-ақ басқа елдердің пациенттері шұғыл көрсетілімдер бойынша да, жоспарлы тексеру мен емдеу үшін де келеді, — деп атап өтті Ермағамбет Қуатбаев Алматы РСК пресс-турында.
Соңғы бір жылда клиникада 18-ден астам жаңа медициналық технология енгізілді. Ең күрделі араласулардың қатарына жүрек трансплантациясы, жасанды сол жақ қарыншаны имплантациялау, жүрекке гибридті операциялар және жүрек ырғағының бұзылуын емдеудің заманауи әдістері кіреді.
Орталықта 600-ден астам қызметкер жұмыс істейді, оның ішінде медицина ғылымдарының докторлары мен кандидаттары, профессорлар мен магистрлер бар. Дәрігерлер Италия, Испания, Қытай, АҚШ, БАӘ, Беларусь және Ресейде тұрақты түрде оқудан өтіп, тағылымдамадан өтеді, сондай-ақ өз тәжірибелерін шетелдік әріптестеріне таныстырады.
Жоғары технологиялық кардиохирургиялық операциялар сақтандырылған азаматтар үшін міндетті әлеуметтік медициналық сақтандыру жүйесі аясында тегін жүргізіледі.
Алматы қаласы бойынша Әлеуметтік медициналық сақтандыру қоры филиалының деректеріне сәйкес, 2019 жылы қалада 5 304 кардиохирургиялық операция жасалса, 2025 жылы олардың саны екі еседен астамға артып, 11 146-ға жеткен. Қаржыландыру көлемі осы кезеңде 7,6 млрд теңгеден 28,3 млрд теңгеге дейін өскен.
Алматы қаласы бойынша ӘМСК филиалының халықты ақпараттандыру бөлімінің басшысы Шынар Әлжанованың айтуынша, стандартты операциялардың бағасы 300 мың теңгеден басталады, ең қымбат процедура — қан айналымының көмекші жүйесін имплантациялау — 79 миллион теңгеге жуық тұрады.
Бұған дейін Алматыда инсульттан кейін тегін оңалтудан қайда өтуге болатыны хабарланған болатын.
Дереккөз: Inform.kz