Медеу ауданында Снегин көшесінің бойында көлік қозғалысы 13 шілдеден бастап ішінара шектеледі. Себебі — 1989 жылы пайдалануға берілген жылу магистралінің учаскесін қайта жаңғырту, деп хабарлайды Almaty.news ақпарат агенттігі.
«Алматы жылу желілері» ЖШС мәліметінше, жұмыстарға байланысты 2026 жылдың 13 шілдесінен бастап Самал-2 шағын ауданындағы Снегин көшесінің Мендіқұлов бульвары мен Достық даңғылы аралығындағы учаскесінде автокөлік қозғалысы шектеледі. Шектеулер жолдың жүру бөлігінің астынан өтетін құбырды қайта жаңғырту кезінде қауіпсіздікті қамтамасыз ету үшін енгізіледі.
Компания жұмыс кезеңінде тұтынушыларға ыстық су беру тоқтатылмайтынын атап өтті.
Қайта жаңғыртылатын жылу магистралі сегіз көппәтерлі тұрғын үй, бір мектеп, екі балабақша және 15 басқа нысанды жылумен және ыстық сумен қамтамасыз етеді. Тұрғындар мен жүргізушілерді жол қозғалысын ұйымдастырудағы өзгерістерді алдын ала ескеріп, уақытша қолайсыздықтарды түсіністікпен қабылдауға шақырады.
Дереккөз: Inalmaty.kz