Алматыда ТЖМ «Қазселденқорғау» ММ-нің бес биік таулы бақылау бекеті жұмысын бастады, олар жарылу қаупі бар мореналық көлдердің жай-күйін тәулік бойы бақылайды, деп хабарлайды Almaty.news ақпарат агенттігі ҚР ТЖМ-не сілтеме жасап.
Бекеттер Үлкен Алматы өзенінің алабындағы №13-бис және №10 көлдерде, Ақсай өзенінің алабындағы №8 және №9–10 көлдерде, сондай-ақ жоғарғы ағыстағы «Күмбел» гидробекетінде орналасқан. Мамандар гидрологиялық жағдайды үздіксіз бақылап, көлдердің жай-күйіндегі ықтимал өзгерістерді қадағалап, қажет болған жағдайда әлеуетті қауіптер туралы ақпаратты жедел жеткізеді. Тәуліктік кезекшілік сел қауіпті кезең аяқталғанша жалғасады.
Бұған дейін Алматы облысында осындай биік таулы бақылау бекеттері орналастырылған. ТЖМ деректері бойынша, бұл шаралар халықтың қауіпсіздігін арттыруға және мореналық көлдердің жарылуына байланысты төтенше жағдайлар қаупін азайтуға бағытталған.
Дереккөз: Inalmaty.kz