Алматыда пайдаланылған батарейкаларды тегін жинау бойынша сынақ жобасы іске қосылды. Бастама Eco Network жобасы аясында жүзеге асырылып, қатты тұрмыстық қалдықтар полигондарына түсетін қауіпті қалдықтар көлемін азайту және қала тұрғындарының назарын экологиялық жауапкершілік мәселелеріне аудару мақсатын көздейді, деп хабарлайды Almaty.news ақпарат агенттігі.
Батарейкаларды жинауға арналған арнайы контейнер Гоголь көшесі, 58 мекенжайындағы «Меломан» дүкенінде орнатылған. Кез келген адам пайдаланылған элементтерді тегін тапсыра алады. Жоба халықтан тұрмыстық батарейкаларды жинауға бағытталған. Пилоттық кезеңде бір адамнан 10 данадан артық пайдаланылған батарейка қабылданбайды.
Жоба енді ғана жұмысын бастағанымен, қала тұрғындары экологиялық бастамаларға жоғары қызығушылық танытып, пайдаланылған элементтерді белсенді түрде әкелуде.
Жобаға ақпараттық қолдауды «Eco Almaty» ЖШС көрсетеді. Ұйымдастырушылар пилоттық жоба тұрғындар арасында сұранысқа ие болады және Алматыда пайдаланылған батарейкаларды қабылдау пункттері желісін кеңейтуге негіз болады деп үміттенеді.
Экологтар батарейкалардың құрамында сынап, кадмий, қорғасын және никель сияқты ауыр металдар мен улы заттар бар екенін еске салады. Олар кәдімгі қоқыс үйіндісіне түскенде, корпусы уақыт өте бұзылып, қауіпті қосылыстар топырақ пен жер асты суларына енеді. Бұл қоршаған ортаның ластануына және адамдардың, жануарлар мен өсімдіктердің денсаулығына кері әсер етуі мүмкін.
Эколог, Eco Network негізін қалаушы Евгений Мухамеджановтың айтуынша, қалдықтарды бөлек жинау үшін қолжетімді инфрақұрылымды дамыту экологиялық мәдениет пен жауапты тұтынуды қалыптастыру жолындағы маңызды қадам болып табылады. Батарейкалар санына шектеу контейнердің негізінен халықтың тұрмыстық қалдықтарын жинау үшін пайдаланылуын қамтамасыз ету үшін енгізілген, ал ұйымдар мен кәсіпорындардың ірі партияларына арналмаған.
Дереккөз: Almaty.tv