Алматыда Республика күні қарсаңында үш жаңа мемлекеттік балабақша іске қосылып, олар барлығы 880 баланы қабылдай алады, деп хабарлайды Almaty.news ақпарат агенттігі.
Атап айтқанда, Құрамыс шағын ауданында 320 орындық (13 топ) № 203 бөбекжай-бақшасы, «Нұрлы Дала» тұрғын үй кешенінде 320 орындық (16 топ) № 204 бөбекжай-бақшасы және Достық шағын ауданында 240 орындық (10 топ) № 207 бөбекжай-бақшасы жұмысын бастады.
Мекемелердің ашылуы тұрғын үй құрылысы қарқынды жүріп, халық саны артып отырған Наурызбай ауданы үшін ерекше маңызды, өйткені мұнда қосымша орындарға сұраныс жоғары болып қалып отыр.
Балабақшалар желісін кеңейту Қазақстан президенті Қасым-Жомарт Тоқаев қойған орын тапшылығын азайту және мектепке дейінгі тәрбие мен оқыту сапасын арттыру міндеттері аясында жүргізіліп отыр.
Сонымен қатар жөндеу мен қайта жаңартудан кейін тағы бес мемлекеттік балабақша – № 81, 37, 168, 89 және 10 мекемелері жұмысын қайта бастады. Қалада мемлекеттік білім тапсырысын орналастыру және жеке секторды мектепке дейінгі білім беруді дамытуға тарту жалғасып жатыр.
Қабылданып жатқан шараларға қарамастан, қосымша орындарға қажеттілік әсіресе тұрғын үй құрылысы қарқынды жүріп, халық саны өсіп отырған аудандарда сақталып отыр.
Қазіргі уақытта халық тығыздығы мен тұрғын алқаптардың болашақ құрылысын ескере отырып, жаңа нысандар үшін жер телімдерін анықтау және дайындау жұмыстары жүргізіліп жатыр.
Алдағы уақытта мемлекеттік балабақшалар салу, жеке инвестициялар тарту және жұмыс істеп тұрған мекемелерді жаңғырту есебінен орын санын көбейту жоспарланып отыр.