Алматыда Гоголь мен Байтұрсынов көшелерінің қиылысындағы бұрынғы трамвай депосының аумағында креативті кластердің құрылысы басталды, деп хабарлайды Almaty.news ақпарат агенттігі.
Қалалық әкімдіктің мәліметінше, болашақ кластердің жалпы ауданы шамамен 32 мың шаршы метрді құрайды. Жоба креативті индустрияларды дамыту үшін заманауи инфрақұрылым құруды көздейді.
Аумақта көпфункционалды концерт залы, іс-шараларға арналған қоғамдық кеңістіктер, студиялар мен шеберханалар, қазақстандық дизайнерлердің шоурумдары, заманауи өнер галереясы, қалалық іс-шараларға арналған атриум, сондай-ақ креативті бизнес өкілдеріне арналған кеңселер орналасады.
Сонымен қатар, жақын маңда амфитеатр, жазғы сахна, саябақ аймағы және балалар ойын алаңдары пайда болады.
Әкімдікте атап өткендей, жоба келісудің барлық қажетті кезеңдерінен өтіп, мемлекеттік сараптаманың оң қорытындысын алған және Қала құрылысы кеңесінің мақұлдауына ие болған. Ескі ғимараттарды бұзу жұмыстары аяқталды, қазір құрылыстың белсенді кезеңі басталды.
Әкімдік бұл аумақты абаттандыру ғана емес, оның функционалдық мақсатын толық өзгерту екенін атап өтті: алаң қаланың креативті экономикасы мен қоғамдық өмірінің жаңа орталығына айналуы тиіс.
Сондай-ақ билік Алматы трамвай көлігінен бас тартпайтынын еске салды. Қалада Абылай хан даңғылы, Төле би көшесі және Момышұлы көшесі бойымен өтетін жеңіл рельсті көліктің (ЛРТ) бірінші желісінің құрылысы басталды. Жаңа трамвай депосын Алатау ауданының Индустриалды аймағында салу жоспарлануда.
Дереккөз: Inalmaty.kz