Алматының Медеу ауданында 31 қазаннан 7 қарашаға дейін көлік қозғалысы уақытша шектеледі, деп хабарлайды Almaty.news ақпарат агенттігі.
«Алатау Жарық Компаниясы» АҚ мәлімдеуінше, шектеу жоғары кернеулі кабельдік электр желісіндегі апаттық-қалпына келтіру жұмыстарына байланысты енгізіледі.
Қозғалыс Ұлар көшесінен Ладушкина көшесімен қиылысқанға дейінгі аралықта шектеледі. Жұмыстар Ладушкина көшесі, 125 мекенжайы бойынша, тікелей жолдың жүріс бөлігінің астында жүргізіледі.
Компания түсіндіргендей, жөндеу қажеттілігі № 2353 кернеуі 220 кВ электр желісінің кабельдік учаскесінің зақымдалуына байланысты туындады.
Электрмен жабдықтаудың қалыпты схемасын қалпына келтіру үшін мамандарға зақымдалған кабельге қол жеткізу қажет. Ол үшін жол жабынын және желі салынған бетон науаны ашуға тура келеді. Тексеруден кейін мамандар кабельді немесе кабельдік муфтаны жөндейді, содан кейін желіні қайта қосу алдында қажетті сынақтар жүргізіледі.
Жұмыстар қауіпсіздік талаптарын сақтай отырып, тәулік бойы жүргізіледі. «Алатау Жарық Компаниясы» АҚ жөндеуді барынша қысқа мерзімде аяқтауға тырысатынына сендірді. Одан кейін жол жабыны толық қалпына келтіріледі.
Жүргізушілер мен қала тұрғындарынан маршруттарын алдын ала жоспарлауды және уақытша шектеулерді ескеруді сұрайды.
Сондай-ақ «АЖК» АҚ жөнделетін учаскеден айналып өту схемасын ұсынды.
Бұған дейін Алматыда 1 қарашадан бастап Солтүстік шеңбер тас жолына апаратын көше учаскесінің жабылатыны хабарланған болатын.