Алматы полициясы әлеуметтік желіде былапыт сөйлеген видеожазба жариялаған блогерді ұстады. Ол сот шешімімен 15 тәулікке әкімшілік қамауға алынды, деп хабарлайды Almaty.news ақпарат агенттігі.
Алматы қалалық Полиция департаментінің мәліметінше, құқық қорғау органдарының назарын әлеуметтік желідегі видео аударған. Онда ер адам ашық түрде былапыт сөздер қолданған. Құқық қорғаушылардың айтуынша, бұл қоғамдық тәртіпті өрескел бұзу және айналасындағыларға құрметсіздік болып табылады.
«Бұзушының жеке басы жедел анықталды. Ол 36 жастағы алматылық болып шықты. Ұсақ бұзақылық жасағаны үшін ол әкімшілік жауапкершілікке тартылды. Сот шешімімен ер адам 15 тәулік мерзімге әкімшілік қамауға алынды», — деп хабарлады ведомствода.
Полиция азаматтарға ескерту жасады.
«Интернетте танымал болуға ұмтылу құқыққа қайшы мінез-құлықты ақтау бола алмайды. Қоғамдық тәртіпті бұзатын кез келген әрекет құқықтық баға алады, ал лайктар мен қаралымдар жинау ниеті нақты жауапкершілікке әкелуі мүмкін», — деп мәлімдеді ведомствода.
Дереккөз: Nur.kz