Алматы Қазақстанның ең инвестициялық тартымды өңірлерінің бірі мәртебесін сақтап отыр. Бұған жоғары кадрлық әлеует, дамыған инфрақұрылым, сыйымды тұтыну нарығы және бизнес жүргізуге қолайлы жағдайлар ықпал етеді, деп хабарлайды Almaty.news ақпарат агенттігі.
Қалалық Кәсіпкерлік және инвестициялар басқармасының мәліметінше, 2026 жылғы қаңтар-маусым аралығында негізгі капиталға салынған инвестиция көлемі 1,021 трлн теңгені құрады. Инвестициялардың физикалық көлем индексі 104,6%-ға жетіп, мегаполистегі инвестициялық белсенділіктің оң динамикасы сақталғанын көрсетеді.
Салымдардың негізгі бөлігін ішкі инвестициялар құрады — 870 млрд теңге. Сыртқы инвестициялар көлемі 151,5 млрд теңгеге жетіп, олардың өсу қарқыны жоғары болып, 112,9% құрады.
Инвесторлар ең көп қызығушылық танытқан салалар — жылжымайтын мүлік, логистика, цифрлық экономика және энергетика. Бірінші жартыжылдықта жылжымайтын мүлікпен операцияларға 299 млрд теңге бағытталды, бұл жалпы инвестиция көлемінің 29,3%-ын құрайды. Көлік және қоймалауға 172,6 млрд теңге (16,9%), ақпарат және байланыс саласына 143,8 млрд теңге (14,1%) салынды. Электр энергиясымен, газбен, бумен, ыстық сумен және ауаны кондиционерлеумен жабдықтау жобаларына 93,9 млрд теңге инвестицияланды.
Сонымен қатар, 2026 жылдың бірінші тоқсанының қорытындысы бойынша тартылған тікелей шетелдік инвестициялар көлемі 2,1 млрд АҚШ долларын құрады. ҚР Ұлттық банкінің деректеріне сәйкес, өткен жылдың сәйкес кезеңімен салыстырғанда көрсеткіш 32,1%-ға төмендеген.
Осыған қарамастан, Алматы инвестициялық белсенділіктің жоғары деңгейін сақтап, елдегі капитал тартудың негізгі орталықтарының бірі болып қала береді. Биыл қалада жалпы сомасы 542,8 млрд теңге болатын 35 инвестициялық жобаны іске асыру жоспарланған.
Жаңа жобалар жұмыс орындарын құруға, өндірістік инфрақұрылымды дамытуға және мегаполис экономикасын одан әрі әртараптандыруға ықпал етеді деп күтілуде.
Кәсіпкерлік және инвестициялар басқармасында инвестициялық бастамаларды іске асыру Алматының Қазақстанның ірі бизнес және экономикалық орталығы ретіндегі позициясын нығайтуға, сондай-ақ оның өңірлік және халықаралық деңгейде бәсекеге қабілеттілігін арттыруға мүмкіндік беретінін атап өтті.
Дереккөз: Almaty.tv