Алматыда құтқарушылар таудан өздігінен түсе алмай қалған үш туристке көмек көрсетті, деп хабарлайды Almaty.news ақпарат агенттігі.
Төтенше жағдайлар министрлігінің Telegram-арнасында үш жас туристің Көкжайлау шатқалы ауданында теңіз деңгейінен шамамен 2 200 метр биіктікте қалып қойғаны хабарланды. Оларға көмекке Алматы қалалық ТЖД Құтқару қызметінің «Бутаковка» бақылау-құтқару бекетінің қызметкерлері шықты.
«Көрсетілген ауданға келіп, құтқарушылар туристерді жедел тауып, олардың жағдайын бағалап, тау маршруты бойынша қауіпсіз түсуді ұйымдастырды. Құтқару операциясы аяқталған соң үшеуі де қауіпсіз жерге жеткізілді», — деп нақтылады ТЖМ.
Министрліктің мәліметінше, туристер медициналық көмекке мұқтаж болмаған.
Дереккөз: Nur.kz