Алматыда Қазақстанның сыбайлас жемқорлыққа қарсы стратегиясының болашағы талқыланды. Мемлекеттік органдар, сарапшылар және азаматтық сектор өкілдері ағымдағы жұмысты қорытындылап, жаңа тұжырымдаманың контурын белгіледі. Кездесудің басты идеясы – жүйелі сыбайлас жемқорлықты жоймай, мемлекеттің тұрақты дамуын қамтамасыз ету мүмкін емес, деп хабарлайды Almaty.news ақпарат агенттігі.
Пікірталауды ашқан Алматы қаласы әкімінің орынбасары Абзал Нүкенов сыбайлас жемқорлықпен күрес мемлекеттік саясаттың басым бағыты екенін атап өтті.
– Әлемдегі ешбір мемлекет сыбайлас жемқорлық деңгейін минимумға түсірмей, тұрақты даму жолына шыға алмайды. Тұрмыстық сыбайлас жемқорлық немесе жүйелі құқық бұзушылық болсын, бәрі қоғамның прогреске жетуіне және бүкіл елдің дамуына басты кедергі болып табылады, – деді әкім орынбасары.
Ол Мемлекет басшысы бастаған реформалардың негізгі бағдары – «Заң және Тәртіп» қағидаты екеніне тоқталды.
Стратегиялық жоспарлау тақырыбын жалғастырған Қазақстан Республикасы Мемлекеттік қызмет істері агенттігінің Алматы қаласы бойынша департаментінің басшысы Еркеболат Нұржігітов ағымдағы кезең – қоғамның барлық топтарының пікірін біріктіру уақыты екенін айтты.
– Біздің басты мақсатымыз – нақты, практикалық қолдануға болатын ұсыныстар алу. Мемлекеттік құрылымдардың, бизнестің және азаматтық қоғамның пікірін ескере отырып, тиімді шешімдер қабылдау өте маңызды, – деп түсіндірді ол.
Оның айтуынша, басымдықтар – цифрлық трансформация және комплаенс институттарын күшейту.
Практикалық аспектілер мен мемлекеттік қызмет жүйесін реформалау қажеттілігі туралы Алматы қаласы бойынша сыбайлас жемқорлыққа қарсы департаментінің бөлім бастығы Қанат Сәлімбаев пікір білдірді. Ол сыбайлас жемқорлықты жеңу үшін тек жазалау ғана емес, сонымен қатар заңды бұзуды тиімсіз және мағынасыз ететін жағдайлар жасау керектігіне назар аударды.
– Сыбайлас жемқорлыққа қарсы іс-қимыл – бір қақпаға ойнау емес, бұл мемлекеттік қызметшілердің, кәсіпкерлердің және қарапайым азаматтардың өзара әрекеті. Сондай-ақ мемлекеттік қызметшілердің мотивация жүйесін қайта қарау керек. Кейде бір бөлімде бір адам бәріне жұмыс істейді, ал қалғандары тек тізімде тұрып, сол жалақыны алады. Бұл жалпы мотивацияны төмендетеді. Банк секторындағыдай сапалы және жедел жұмыс істейтін қызметкерлерге бонустар мен көтермелеу жүйесін енгізуді ұсынамын, – деді Қанат Сәлімбаев.
Оның сөзінше, егер қызметкер тиімді жұмыс істеп, қоғамға пайда әкелсе, ол кері байланысты сезінуі керек, әйтпесе іске тек зиян келтіретін формализмге тап болуға тура келеді.
Мәселеге ғылыми көзқарасты әл-Фараби атындағы ҚазҰУ кафедрасының меңгерушісі Қарлығаш Усеинова ұсынды. Ол сыбайлас жемқорлыққа қарсы мәдениеттің «кластерлік басқару» жүйесін енгізуді ұсынды. Оның пікірінше, дәл жоғары оқу орындары ертең мемлекеттік органдар мен бизнеске келетін жастарда «академиялық адалдықты» қалыптастыру орталығына айналуы керек.
Дереккөз: Almaty.tv