Алматыда көпжылдық ағаштардың рұқсатсыз кесілуіне қатысты полиция қылмыстық іс қозғады, деп хабарлайды Almaty.news ақпарат агенттігі.
Әлеуметтік желіде қала тұрғындары таратқан бейнежазбада көпжылдық ағаштардың кесіліп жатқаны көрінеді. Жазба авторы бұл әрекетті «варварлық» деп атап, ағаштардың ұзақ жылдар бойы қаланы көркейтіп келгенін атап өтті.
«Мына сұлулықтың қалай кесіліп жатқанын көріңіздер! Мұнда кезекті тұрғын үй кешенін салуға жиналып жатыр. Ағаштар қанша жыл тұрып, қаланы жасылдандырып, көркейтіп келді… енді осылай болып жатыр. Бұл варварлық», — делінген жазбада.
Бейнежазба Байтұрсынов көшесінде түсірілгені нақтыланды.
Алматының Бостандық ауданы әкімдігі бұл жазбаға жауап берді. Әкімдіктің мәліметінше, аталған аумақ жеке меншікте. Табиғат қорғау полициясы келтірілген залалдың мөлшерін анықтау үшін экология басқармасына сұраныс жолдаған.
Сонымен қатар Бостандық ауданының полиция басқармасы ағаштарды кесу фактісі бойынша іс қозғады.
«Аталған аумақ жеке меншікте. Табиғат қорғау полициясы келтірілген залалдың мөлшерін анықтау үшін экология басқармасына сұраныс жолдады. Сондай-ақ Бостандық ауданының полиция басқармасы ағаштарды кесу фактісі бойынша іс қозғады. Хабарласқаныңызға рақмет», — делінген әкімдік хабарламасында.
Алматы әкімдігінің экология басқармасы да бұл фактіге қатысты түсініктеме берді. Ведомствоның мәлімдеуінше, көрсетілген мекенжайда жасыл желектерді кесуге рұқсат алу үшін өтініш түспеген, сондықтан рұқсат берілмеген.
«Басқармаға көрсетілген мекенжайда жасыл желектерді кесуге рұқсат алу үшін өтініш түспеген, осыған байланысты кесуге рұқсат берілмеді. Оқиға орнына шығу қорытындысы бойынша келтірілген залал есептелді, материалдар құзыреті шеңберінде тиісті шаралар қабылдау үшін полиция департаментіне жолданды», — деп қосты ведомствода.