Алматы мен Астана халықаралық QS Best Student Cities 2027 рейтингінде позицияларын жақсартып, Қазақстанның жоғары білім беру саласындағы өңірлік орталық ретіндегі тартымдылығын растады, деп хабарлайды Almaty.news ақпарат агенттігі ҚР Ғылым және жоғары білім министрлігіне сілтеме жасап.
Алматы бірден 13 позицияға көтеріліп, әлемде 78-орынға ие болды – бұл қазақстандық қалалар арасындағы ең үздік нәтиже және Орталық Азия қалалары арасындағы ең жоғары көрсеткіш. Астана да 8 позицияға көтеріліп, 119-орынға жайғасты. Осылайша, екі қазақстандық қала да өңір көшбасшылары қатарына енді.
QS Best Student Cities рейтингі халықаралық аналитикалық агенттік QS Quacquarelli Symonds жариялайды және қалаларды алты негізгі категория бойынша бағалайды: университеттердің академиялық беделі, қаланың тартымдылығы, түлектердің жұмыс берушілер арасында сұранысқа ие болуы, білім алу мен тұрудың қолжетімділігі, студенттік қауымдастықтың халықаралық әртүрлілігі және студенттердің өз бағалары. Зерттеуге әлемнің 150 қаласы енгізілген, олар халық саны мен QS World University Rankings 2027-де ұсынылған университеттердің болуы бойынша белгіленген критерийлерге сәйкес келеді.
Алматының табысының негізгі факторларының бірі – университет жүйесінің жоғары деңгейі. Қалада QS World University Rankings 2027-ге енген тоғыз университет орналасқан. Осының арқасында «Университеттердің рейтингтегі нәтижелері» көрсеткіші бойынша Алматы әлемде 50-орынды иеленіп, қаланың университеттік экожүйесінің жиынтық күшін көрсетеді.
Қазақстанның күшті жағы – жоғары білімнің қолжетімділігі. Оқу мен тұру құны көрсеткіші бойынша Астана әлемде 9-орында, Алматы 24-орында, бұл қазақстандық қалаларды шетелдік студенттер үшін білім алу шығындары тұрғысынан ең тартымдылардың біріне айналдырады.
Студенттік контингенттің әртүрлілігі көрсеткіші бойынша да оң динамика байқалады, бұл студенттік қауымдастықтың халықаралық құрамын көрсетеді. Алматы мен Астана нәтижелерінің жақсаруы қазақстандық университеттердің әртүрлі елдерден келген студенттер үшін тартымдылығының артып келе жатқанын көрсетеді.
Алматы мен Астананың QS Best Student Cities 2027-дегі позицияларының өсуі қазақстандық жоғары білімнің халықаралық бәсекеге қабілеттілігінің артқанын растап, елдің жаһандық білім картасындағы орнын нығайтады.
Дереккөз: Almaty.tv