20 шілдеде «ҚазАвтоЖол» ҰК» АҚ Алматы облысы Қарасай ауданындағы халықаралық маңызы бар «Алматы – Бішкек» автомобиль жолының 19–27 шақырым аралығындағы учаскесін күрделі жөндеу және кеңейту жобасын іске асыруға ресми түрде бастама берді, деп хабарлайды Almaty.news ақпарат агенттігі.
Жоба Мемлекет басшысының елдің заманауи көлік инфрақұрылымын дамыту жөніндегі тапсырмасын орындау аясында жүзеге асырылып, Қазақстандағы ең жүктемелі көлік дәліздерінің бірін жаңғыртуға бағытталған. Бұл жолдан күн сайын 70 мыңнан астам автомобиль өтеді.
Жобаны іске асыру Алматыға кіру және шығу өткізу қабілетін едәуір арттыруға, жол қозғалысы қауіпсіздігін күшейтуге және қала маңындағы елді мекендердің тұрғындары, мегаполис қонақтары мен транзиттік көлік үшін қолайлы жағдай жасауға мүмкіндік береді.
Салтанатты шараға орталық және жергілікті атқарушы органдардың өкілдері, жол саласының басшылығы, мердігер ұйымдар мен жұртшылық қатысты.
«ҚазАвтоЖол» ҰК» АҚ басқарма төрағасы Дархан Иманашев жобаның елдегі ең ірі қалалық агломерация үшін стратегиялық маңызы бар екенін атап өтті.
— Мемлекет басшысының тапсырмасын орындау үшін біз Алматы агломерациясы үшін маңызды инфрақұрылымдық жобалардың бірі — Алматы — Бішкек автомобиль жолының учаскесін күрделі жөндеуге және кеңейтуге кірістік. Бұл Алматының бас көлік қақпасы, мұнда күн сайын Қазақстандағы ең жоғары қозғалыс қарқындылығы тіркеледі. Жобаны іске асыру жолдың өткізу қабілетін едәуір арттыруға, қозғалыс қауіпсіздігін күшейтуге және жүздеген мың автокөлік жүргізушілеріне қолайлылықты қамтамасыз етуге мүмкіндік береді. Бұл көлік инфрақұрылымын, өңір экономикасын дамытуға және азаматтарымыздың өмір сүру сапасын арттыруға салынған инвестиция, — деп атап өтті Дархан Иманашев.
Қазіргі уақытта қолданыстағы төрт жолақты жол көлік жүктемесінің артуына төтеп бере алмай отыр, бұл тұрақты кептелістерге, қозғалыстың орташа жылдамдығының төмендеуіне және жол-көлік оқиғалары қаупінің артуына әкеледі. Жоба аясында автомобиль жолын төрт жолақтан сегіз жолаққа дейін кеңейту көзделген, бұл учаскені үздіксіз қозғалыстағы жалпықалалық магистральдық көше параметрлеріне келтіруге мүмкіндік береді.
Күрделі жөндеу аясында мыналар салынады: жолдың әр бағытында үш жолақтан және бір қосымша жолақтан тұратын сегіз жолақты жол, қауіпсіз жаяу жүргіншілер өткелдері мен бағдаршамдар, заманауи жарықтандыру жүйелері, жаңбыр суын бұру жүйелері және жол белгілері мен бағдаршамдар. Сонымен қатар, жоба газ құбырларын, су құбырларын, электр желілерін және талшықты-оптикалық байланыс желілерін қоса алғанда, инженерлік коммуникацияларды ауыстыруды көздейді. Жұмыстар аяқталғаннан кейін Алматы мен қала маңындағы елді мекендер арасындағы жол жүру уақыты айтарлықтай қысқарады, мегаполиске кіретін негізгі кіреберістердің бірінің өткізу қабілеті артады, көлік жүктемесі төмендейді, жол қозғалысы қауіпсіздігінің деңгейі көтеріледі және жергілікті және транзиттік көлік қозғалысы үшін қолайлы жағдайлар жасалады.
Дереккөз: Inform.kz