Алматы халықаралық әуежайының Майлин көшесі жағынан негізгі кіреберіс аркасы қайта жаңғыртылып, қозғалыс үшін ашылды, деп хабарлайды Almaty.news ақпарат агенттігі.
Әуежай баспасөз қызметінің мәліметінше, енді негізгі кіреберіс екі бағытта да — кіру және шығу үшін пайдаланылады.
Майлин көшесі жағынан вокзал алаңына кіру және шығу үшін 11 жолақ қолжетімді: төртеуі кіруге, жетеуі шығуға арналған.
Сонымен қатар, «Ақсұңқар» қонақ үйінің жанындағы екі кіреберіс енді тек екінші қабатқа, T1 және T2 терминалдарының ұшу аймақтарына өту үшін қолданылады.
Жабық тұрақ кешенінің пайдаланушылары үшін Закарпатская көшесіне тікелей шығу қарастырылған.
Әуежай жолаушылар мен келушілерге маршрутты жоспарлау кезінде өзгерістерді ескеріп, әуежай аумағындағы жол белгілеріне сүйенуді ұсынады.
Жаңартылған қозғалыс схемасы көлік ағындарын біркелкі бөлуге және терминалдар мен тұрақ инфрақұрылымына қолжетімділікті жақсартуға мүмкіндік береді деп күтілуде.
Еске салайық, Алматы әуежайының аумағына кіру схемасы биылғы мамыр айында Майлин көшесі жағынан негізгі кіру тобының қайта жаңғыртылуына байланысты өзгертілген болатын.
Қазіргі уақытта әуежайдың ішкі рейстер терминалын жаңғырту жұмыстары жалғасуда. Жұмыстарды қыркүйек айының соңына дейін аяқтау жоспарлануда.