Алматының Түрксіб ауданында «Халық қатысатын бюджет» бағдарламасы аясында жаңа қоғамдық кеңістік пайда болды. Жаһангир көшесіндегі №14 үйдің ауласында құны 63 млн теңге болатын кешенді абаттандыру жұмыстары аяқталды. Нысанды бүгін Түрксіб ауданы әкімдігі мен Алматы қаласының Өңірлік коммуникациялар қызметі ұйымдастырған пресс-тур барысында журналистерге көрсетті, деп хабарлайды Almaty.news ақпарат агенттігі.
Абаттандыру барысында аумақ толық ретке келтірілді. Мұнда учаскені жоспарлау, сыртқы жарықтандыруды монтаждау, брусчатка мен асфальтбетон жабынын төсеу, шағын архитектуралық формалар, орындықтар, қоқыс жәшіктері, пергола, жаңа үстел теннисі және қоршау орнату, сондай-ақ жасыл желектерді санитарлық кесу жұмыстары жүргізілді.
Жергілікті тұрғындардың айтуынша, абаттандырудан кейін аула әртүрлі жастағы адамдар үшін толыққанды демалыс орнына айналды.
«Кешке біз осында отырамыз, әжелер, бәріміз жиналамыз. Барлық жас аналар да балаларымен, туыстарымен келеді. Шынын айтқанда, біз қала орталығында тұратындай сезімдеміз. Тіпті одан да жақсы. Мұнда нағыз саябаққа келгендей отырамыз. Рахаттана демаламыз. Мен өте ризамын. Тек мен емес, көшеміздің барлық тұрғындары осы өзгерістерге қуанышты», — деді Түрксіб ауданының тұрғыны Сара Мұталханова.
Түрксіб ауданының әкімі Дәмір Акежанов атап өткендей, аумақты абаттандыру тұрғындардың тілектерін ескере отырып жүргізілді.
«Бұрын мұнда ештеңе болмаған, ал қазір заманауи алаң пайда болды. Қарасаңыз, бұрын мұнда ескі үстел теннисі тұрған, ол әлдеқашан ауыстыруды қажет ететін. Қазір жаңасын орнаттық, тұрғындар шынымен риза», — деді аудан әкімі.
Оның айтуынша, жаңа қоғамдық кеңістік қазірдің өзінде сұранысқа ие демалыс орнына айналды.
«Кешке мұнда балалар ойнайды, үстел теннисіне ересектер де келеді. Кеңістік үнемі пайдаланылады, біз дәл осыған қол жеткізгіміз келді — аула тұрғындар үшін жанды және жайлы болуы үшін», — деп қосты Дәмір Акежанов.
Қазіргі уақытта нысандағы барлық құрылыс-монтаж жұмыстары толық көлемде аяқталды. Жаңа демалыс аймағы тұрғындар үшін ашық және күнделікті серуендеу, қарым-қатынас жасау және белсенді демалыс орны ретінде пайдаланылады.
Дереккөз: Almaty.tv