Алматыда 2022 жылғы қаңтар оқиғалары кезінде жабдықталған болуы мүмкін қару-жарақ қоймасы табылды, деп хабарлайды Almaty.news ақпарат агенттігі.
Құқық қорғау органдарын қоймаға Шығыс Қазақстандағы сотталған адаммен жұмыс кезінде алынған жедел ақпарат алып келген. Қойма Наурызбай ауданынан табылды. Оны ІІМ Қылмыстық-атқару жүйесі комитетінің №22 мекемесінің жедел бөлімі қызметкерлері Мамандандырылған прокуратура және ҰҚК Департаментінің 5-басқармасының үйлестіруімен анықтады.
Қарау кезінде қоймадан тесік ұңғылы мылтық пен оқ-дәрілер алынды. Сот-баллистикалық сараптама тағайындалды. Құқық қорғау органдары қарудың шығу тегін және оны жасыруға қатысы бар адамдарды анықтауда.
— Тіпті жылдар өтсе де, жедел жұмыс нәтиже беруді жалғастыруда. Сотталғандармен жұмыс кезінде алынған ақпарат өткен жылдардағы қылмыстарды ашуға, қару-жарақ қоймаларын табуға және қоғамдық қауіпсіздікке ықтимал қатерлердің алдын алуға жиі көмектеседі. Бұл қылмыстық-атқару жүйесі қызметкерлерінің басқа құқық қорғау органдарымен өзара іс-қимылындағы күнделікті жұмысының маңыздылығын тағы бір рет растайды, — деді ШҚО бойынша ҚАЖ Департаментінің ресми өкілі Салтанат Ожиканова.
Маусым айында Kazinform LRT жанынан табылған патрон бір жылдан кейін Астана әуежайында студенттен анықталғанын хабарлаған болатын.
Дереккөз: Inform.kz