ФК «Қайрат» ресми мәлімдеме жасап, Канье Уэсттің концертіне байланысты өз матчтарын Алматыдан Түркістанға ауыстыратынын хабарлады, деп хабарлайды Almaty.news ақпарат агенттігі. Ауыстыруды УЕФА мақұлдаған.
Еске салайық, 17 шілдеде Канье Уэсттің Алматыдағы концерті туралы ақпарат пайда болды. Алдымен бұл туралы оның менеджері Джозеф Карре хабарлады, кейін Алматы әкімдігі концерттің 14 тамызда сағат 21:00-де Орталық стадионда өтетінін растады.
Алайда концерт жарияланғаннан кейін «Қайрат» басшылығы оқиғаны ұйымдастыру олармен келісілмегенін мәлімдеді.
Бүгін клубтың баспасөз қызметі жаңа мәлімдеме жасап, концерт еурокубоктың үшінші іріктеу кезеңіндегі үй матчының өту кезеңіне сәйкес келетінін, сондықтан «Қайраттың» үй аренасы кездесуді ұйымдастыру мен өткізу үшін қолжетімсіз болатынын еске салды.
«Қалыптасқан жағдайды және еурокубоктық қарсыластықтың тығыз күнтізбесін ескере отырып, клуб УЕФА-ға үшінші іріктеу кезеңіндегі ықтимал үй матчының өтетін орнын ауыстыру туралы өтінішпен жүгінді. Осы өтінішті қарау нәтижесінде кездесуді Түркістан қаласындағы «Түркістан Арена» стадионында өткізу келісілді», — делінген мәлімдемеде.
Матчтың күні мен уақыты, сондай-ақ билет сатылымының басталуы туралы ақпарат команданың еурокубоктық жолы анықталғаннан кейін қосымша жарияланатыны хабарланды.
Дереккөз: Nur.kz