Алматы — Астана бағытындағы рейстен мас күйдегі екі жолаушыны қоғамдық тәртіпті бұзғаны үшін түсіріп тастады, оның біреуі қайталанған құқық бұзушылық үшін сот арқылы жауапқа тартылады, деп хабарлайды Almaty.news ақпарат агенттігі Polisia.kz-ке сілтеме жасап.
Тексеру барысында құқық бұзушылардың 37 жастағы Алматы тұрғыны және 26 жастағы Түркістан облысының тұрғыны екені анықталды. Рейске тіркелу кезінде екеуі де алкогольдік мас күйінде болып, қоғамдық тәртіпті бұзған. Оның ішінде 26 жастағы жолаушы былапыт сөйлеген. Бұл туралы көлік полициясы департаменті бастығының бірінші орынбасары Теміржан Рамазанов хабарлады.
— Құқық бұзушылардың біреуіне қоғамдық орында мас күйінде жүргені үшін әкімшілік материал жасалды. Ол осыған ұқсас құқық бұзушылықты қайталағандықтан, жиналған материалдар шешім қабылдау үшін сотқа жіберілді. Екінші жолаушы екі бап бойынша жауапқа тартылды: қоғамдық орында мас күйінде жүру және ұсақ бұзақылық, — деді ол.
Сондай-ақ көлік полициясы ескертеді: әуе және теміржол көлігі объектілерінде қоғамдық тәртіпті бұзу заңнамада көзделген жауапкершілікке әкеп соғады. Құқық бұзушылар сапардан айырылып қана қоймай, әкімшілік, ал кейбір жағдайларда қылмыстық жауапкершілікке тартылуы мүмкін. Қоғамдық тәртіп пен жолаушылар қауіпсіздігіне қатер төндіретін кез келген әрекет дереу тоқтатылады.
Дереккөз: Inform.kz