Алматы тұрғыны шетелде көз түсін өзгерту операциясын жасатып, көру қабілетінен айырыла жаздады. Асқынулар салдарынан бір көзі мүлдем көрмей қалса, екіншісі тек жарықты ғана сезетін болған, деп хабарлайды Almaty.news ақпарат агенттігі.
Науқасты құтқаруға Алматы қалалық орталық клиникалық ауруханасының мамандары кірісті. Офтальмолог Гүлзат Әбдірайымова мен оның командасы шамамен екі сағатқа созылған күрделі аралас операция жасады.
«Операция барысында дәрігерлер көзішілік қысымды төмендетіп, қасаң қабықты трансплантациялады. Жүргізілген емнің арқасында науқастың көру қабілетін қалпына келтіру мүмкін болды», — деп хабарлады ведомствода.
Қазіргі уақытта науқас оңалту курсынан өтіп жатыр. Дәрігерлердің айтуынша, қалпына келу сәтті жүріп жатыр, оң динамика байқалады. Ауруханада хабарлағандай, жыл басынан бері мекеме мамандары қасаң қабықты трансплантациялау бойынша 12 операция жасаған. Мұндай араласулар ауыр аурулар мен асқынулар кезінде пациенттерге көру қабілетін сақтауға немесе қалпына келтіруге көмектеседі.
Дереккөз: Inalmaty.kz