Бүгін Қазақстанда Мемлекеттік қызметшілер күні атап өтілуде. Алматыда бұл салада 3 000-нан астам адам жұмыс істейді. Олардың жартысына жуығы – әйелдер, ал әрбір үшінші қызметкер 35 жастан кіші, деп хабарлайды Almaty.news ақпарат агенттігі.
Тарихи жадыны сақтауға Ләззат Мырзабекова жауапты. Ол мемлекеттік қызметте жиырма жылға жуық уақыт еңбек етті. Бүгінде оның басшылығымен ескерткіштерді есепке алу және қорғау жүргізіліп, мемориалдық тақталар орнатылып, 40-қа жуық қалалық кітапхана мен музейлер бірлестігінің жұмысы үйлестіріледі. Оның айтуынша, қазіргі мемлекеттік қызметші тек жауапты ғана емес, сонымен қатар икемді, жаңа сын-қатерлерге жылдам жауап бере алатын болуы керек.
«Мен еңбек жолымды 2009 жылы бастадым. Осы жылдар ішінде әртүрлі салаларда жұмыс істеуге тура келді, бірақ басты мақсат әрқашан өзгеріссіз қалды – мемлекетке пайда әкелу. Жыл сайын мемлекеттік қызметшілерге қойылатын талаптар өзгереді. Креативтілік пен жеделдік қажет. Қазір қызметкерлер үшін барлық қажетті жағдай жасалуда», – деді Мәдениет басқармасының тарихи-мәдени бөлімінің басшысы Ләззат Мырзабекова.
Мемлекеттік қызметшілердің жаңа буынын Аяулым Оразбек таныстырады. Бірнеше жыл бұрын ол студент болып, қоғамдық өмірге белсене қатысып, әкімдікте тағылымдамадан өтті. Дәл сол кезде қыз өмірін мемлекеттік қызметпен байланыстырғысы келетінін түсінді. Бүгінде ол Алматы жастар саясаты басқармасының бөлімінде бас маман болып жұмыс істейді. Оның міндеттеріне кадр мәселелері, азаматтардың өтініштерімен жұмыс және басқарма қызметін ұйымдастыру кіреді.
«Менің ойымша, жастардың мемлекеттік қызметке келуіне көмектесетін мүмкіндіктерді кеңейту қажет. Студенттік ұйымдардағы белсенділік, қоғамдық жобаларға қатысу және мемлекеттік органдардағы тағылымдамалар жастардың бұл салаға деген қызығушылығын арттырады. Егер мұндай жұмыс жүйелі түрде жалғасатын болса, кадрлық әлеует нығайып, жас мамандар көбейеді», – деп сенім білдірді Жастар саясаты басқармасының әкімшілік-құқықтық бөлімінің бас маманы Аяулым Оразбек.
Бүгінде мемлекеттік қызметке қызығушылық артып келеді. Орта есеппен бір бос орынға 6-7 адам үміткер. Ал жүйенің өзі біртіндеп жаңарып, жас әрі заманауи бола түсуде, дейді мамандар. Елімізде қазақстандық мемлекеттік қызметшілер күні ресми түрде 2014 жылдан бастап атап өтіледі. Айта кетейік, бұл күн БҰҰ-ның Мемлекеттік қызмет күнімен тұспа-тұс келеді.
Дереккөз: Almaty.tv