2026 жылғы 11 қыркүйекте Қазақстан Ұлттық банкі мен Ұлттық төлем корпорациясы қаржы секторының топ-менеджерлерін, бірінші басшыларын және саланың жетекші сарапшыларын Central Asia Fintech Summit (CAFS) саммитіне жинайды, деп хабарлайды Almaty.news ақпарат агенттігі.
Алматыдағы «Целинный» заманауи мәдениет орталығында өтетін ауқымды шараның басты тақырыбы — «Сенім дәуірі: қаржы нарығы келесі онжылдықта қандай болады».
Алдағы саммиттің бағдарламасы цифрлық экономиканың негізгі сын-қатерлері мен макротрендтеріне бағытталған. Ірі қаржы институттарының басшылары, финтех-компаниялар мен мемлекеттік сектор өкілдері саланың стратегиялық даму бағыттарын, жаңа буын төлем жүйелерінің болашағын және цифрлық қаржының трансшекаралық мүмкіндіктерін талқылайды.
Ұйымдастырушылар бүгінде нарық архитектурасын өзгертіп жатқан технологиялық инновацияларға ерекше мән береді. Пікірталас панельдерінде сарапшылар жасанды интеллектінің нақты экономикадағы практикалық қолданылуын және қадағалау технологияларының эволюциясын қарастырады.
Саммиттің маңызды бөлігі — цифрлық қаржы активтері үшін жаһандық бәсекелестік пен алаяқтықтан қорғаудың ұжымдық жүйесін құруды талқылау, бұл заманауи қаржы технологияларына деген сенімнің негізі болып табылады.
CAFS 2026 алаңында аймақтың финтех-экожүйесін кеңейту бойынша жаңа стратегиялық бастамалар ұсынылып, цифрлық экономиканы қорғау және инклюзивті технологиялық қауымдастықтарды дамыту саласындағы үздік жетістіктер атап өтіледі.
Central Asia Fintech Summit (CAFS) — аймақтағы қаржы және технология секторларының басты оқиғаларының бірі. Іс-шара банк саласының топ-менеджерлерін, мемлекеттік сектор мен финтех-компаниялар өкілдерін цифрлық экономика мен қаржы нарығының болашағын талқылау үшін біріктіреді.
Өткізілетін орны: Алматы қ., Масанчи к-сі, 59 («Целинный» заманауи мәдениет орталығы).
Тіркелу және бағдарламаның толық нұсқасы: centralasiafintech.kz
Дереккөз: Inform.kz