Алматы әкімі Дархан Сатыбалды жеке және иесіз электр желілерін коммуналдық меншікке беру және электрмен жабдықтау сенімділігін арттыру мәселелері бойынша кеңес өткізді, деп хабарлайды Almaty.news ақпарат агенттігі.
Кездесу барысында жеке желілерді пайдаланудың жүйелік проблемалары, жиі жарықтың сөну себептері және жинақталған мәселелерді кезең-кезеңмен шешу шаралары қарастырылды.
«Қаладағы жеке электр желілерінің едәуір бөлігінің тозу деңгейі жоғары және олар тиісті техникалық қызмет көрсетумен қамтамасыз етілмейді. Бұл авариялық өшірулерге, кернеудің ауытқуына және тұрғындардан түсетін өтініштердің өсуіне әкеледі. «Алатау Жарық Компаниясы» АҚ (АЖК) деректері бойынша, жеке желілердің тозу деңгейі кейбір жағдайларда 80%-дан асады», — делінген хабарламада.
Сондай-ақ мамандар жеке желілердің есепке алу және баланстық тиесілілігінің ашық жүйесінің жоқтығын, бұл оларды пайдалану мен жаңғыртуды қиындататынын айтты. Кеңес аясында аудандар бойынша жеке желілер мен өшірулер саны туралы деректер де жарияланды.
Соңғы алты айда жеке желілерде 295 өшіру тіркелді, бұл Алматы бойынша жалпы өшірулердің шамамен 45%-ын құрайды. Сондай-ақ Наурызбай, Бостандық, Медеу және басқа аудандардағы проблемалық учаскелер қаралды, онда ең көп өшірулер тіркелген.
«Қала әкімі ведомствоаралық үйлестіруді күшейтуді және иесіз желілерді коммуналдық меншікке қабылдау жұмыстарын жеделдетуді, одан кейін оларды АЖК-ге пайдалануға беруді тапсырды. Басымдықтар ретінде тұрғын үй кешендері, авариялық учаскелер және әлеуметтік маңызы бар нысандар анықталды. Сондай-ақ желілердің тиесілілігін анықтаудың, жеке шоттар ашудың және одан әрі пайдалануды қамтамасыз етудің бірыңғай тетігін әзірлеу тапсырылды. Бұл жұмысқа әкімдіктің профильді басқармалары, энергетикалық қадағалау органдары, қала прокуратурасы және АЖК қатысады», — деп атап өтті ведомствода.
Дереккөз: Nur.kz