Алматыда жеңіл рельсті көлік (LRT) желісін салу жобасының жаңа мәліметтері белгілі болды. Бұл жолы қала әкімдігі Астанадан өзгеше шешім қабылдап, эстакада салмай, жолды жер бетімен жүргізуді жоспарлап отыр, деп хабарлайды Almaty.news ақпарат агенттігі.
Алматы қалалық жол қозғалысын ұйымдастыру және жолаушылар көлігі басқармасының басшысы Ержан Диханбаевтың айтуынша, жоба бастапқыда жер үстіне арналған. Төле би көшесінде бұрынғы трамвай жолдары сақталған, сондықтан оны қайта пайдалану тиімді. Егер трамвай жолдарын бұзып тастаса, кейін қоғамдық көлікке жолақты қайтару қиынға соғар еді. Автомобиль жүргізушілеріне жолақты алып қою ұнамайды, бірақ қазір мұндай мәселе жоқ. Сонымен қатар жер үсті нұсқасы эстакадаға қарағанда арзанырақ.
— Бастапқыда Алматыдағы жоба LRT желісі жер бетімен өтетіндей етіп ойластырылды, себебі Төле би көшесінде бұрынғы трамвай желісінің дәлізі бар — қала ескі трамвай жолдарын сақтап қалды. Егер оларды бұзып тастаса, қоғамдық көлікке автомобиль жолақтарын қайтару қиын болар еді. Автомобильшілерге жолақты алып қойған ұнамайды, бірақ қазір мұндай мәселе жоқ. Бұрынғылар да жер үсті LRT жоспарлаған сияқты. Тағы бір себебі — жер үсті нұсқасы эстакадалық инфрақұрылымнан арзан, — деді Ержан Диханбаев Алматы РСК-дағы брифингте.
Сонымен қатар ол қалада Астанадағыдай эстакадалық желілік көлік жобалары бар екенін, бірақ мерзімі мен мәліметтері әзірге белгісіз екенін айтты. Төле би көшесіндегі трамвайға арналған бөлек жолақ тек ішінара ғана бөлінген, көп бөлігінде олар автомобильдермен бірге жүруге мәжбүр болған. Басқарма басшысы LRT жағдайында мұндай тәжірибе болмайтынына сендірді.
— Бұл мәселе пысықталуда. Егер желілік көлік салатын болсақ, Төле би бойындағы автобус жолағы қажет болмайды, оны жеңіл көліктерге береміз, — деді Ержан Диханбаев.
Болашақ LRT бағытының тағы бір бөлігі Абылай хан даңғылымен өтеді, онда троллейбус желілері бар. Троллейбустар мен LRT-дің бірге жүруі үшін Абылай ханды бір бағытты ету нұсқасы қарастырылуда. 2017 жылы көптеген бір бағытты қозғалыс енгізіліп, ол тиімділігін көрсетті.
Ержан Диханбаевтың сөзінше, LRT жобасы қазір мемлекеттік сараптамада, нәтижесі 2026 жылдың шілдесінде күтіледі. Дайындық жұмыстары — демонтаж, алаң дайындау, желілерді күшейту жүргізілуде. LRT құрылысының белсенді фазасы жоба сараптамадан өткеннен кейін басталады.
Еске салайық, Алматыдағы LRT-дің бірінші желісінің ұзындығы 18 шақырымды құрайды. Маршрут Абылай хан, Төле би, Бауыржан Момышұлы көшелерімен, Almaty Arena спорт кешені арқылы қаланың индустриалды аймағына дейін барады.
Дереккөз: Inform.kz