Алматы әкімі Дархан Сатыбалдының төрағалығымен балалар нейрохирургиясы бойынша халықаралық мамандармен ынтымақтастық мәселелері талқыланды, деп хабарлайды Almaty.news ақпарат агенттігі.
Кездесуге Израиль, Германия, Италия, АҚШ және Ресейден келген жетекші мамандар қатысты. Қонақтардың арасында Pediatric Brain Center директоры Шломи Константини, Charité – Universitätsmedizin Berlin профессоры Ульрих-Вильгельм Томале, University of Alabama at Birmingham балалар нейрохирургиясы бөлімінің директоры Джеффри Блаунт, A. Gemelli Hospital кеңесшісі Лука Массими және В. А. Алмазов атындағы Ұлттық медициналық зерттеу орталығының профессоры Александр Ким бар.
«Мемлекет басшысының тапсырмасы бойынша еліміздегі медициналық көмек сапалы әрі қолжетімді болуы керек, әсіресе балалар үшін. Мұндай кездесулер біздің мамандарға озық халықаралық тәжірибені үйреніп, оны тәжірибеде қолдануға мүмкіндік береді. Бұл өзара іс-қимыл жүйелі сипат алады деп үміттенеміз», — деді Дархан Сатыбалды.
Алматы қалалық Қоғамдық денсаулық сақтау басқармасының басшысы Марат Пашимовтың айтуынша, Алматы мен Қазақстан өңірлеріндегі балалар нейрохирургиясы тұрақты өсім көрсетіп, диагностика мен хирургиялық емдеу мүмкіндіктері кеңейіп, озық технологиялар енгізілуде.
№2 Балалар қалалық клиникалық ауруханасының директоры Марат Рабандияровтың сөзінше, клиникада жыл сайын 400-ден астам нейрохирургиялық операция жасалады, оның ішінде ми мен жұлын ісіктері, бас сүйегінің туа біткен ақаулары, эпилепсияны хирургиялық емдеу және орталық жүйке жүйесінің ауыр ақаулары бойынша операциялар бар.
Халықаралық ынтымақтастық шеңберінде №2 Балалар қалалық клиникалық ауруханасында балаларды операцияның негізгі кезеңдерінде ояту әдісі енгізілді. Халықаралық сарапшылардың бағалауы бойынша, бұл тәсіл команданың жоғары технологиялық жарақтандырылғанын және кәсібилігін көрсетеді.
Осыған байланысты International Society for Pediatric Neurosurgery Алматыда балалар нейрохирургиясы бойынша халықаралық конференция өткізуге дайын екенін білдіріп, қаланы белсенді дамып келе жатқан орталық ретінде қарастырады.
Дереккөз: Almaty.tv