Алматыдағы Бағанашыл шағын ауданындағы балалар үйін қайта жаңарту жұмыстары 2026 жылдың қыркүйек айының соңына дейін аяқталады деп жоспарланған. Қазіргі уақытта нысанда белсенді құрылыс жұмыстары жүріп жатыр, деп хабарлайды Almaty.news ақпарат агенттігі.
Сырғабеков көшесі, 22 мекенжайында орналасқан ғимарат 2025 жылдың тамыз айында қала коммуналдық меншігіне берілген. Бұған дейін нысан Алматы облысының балансында болған. Сол жылдың қараша айында мұнда ауқымды реконструкция басталды.
Қазір аумақта төрт ескі корпус бұзылып, тек негізгі төрт қабатты блок қалдырылды. Алаңда жаңа ғимараттарға шұңқырлар қазылып, арнайы техника мен құрылысшылар жұмыс істеп жатыр.
«Біз тек бір негізгі төрт қабатты панельді корпусты қалдырдық. Қазір оны нығайту жұмыстары жүргізілуде. Болашақта ғимарат толық жаңартылып, қолданыстағы стандарттарға сәйкестендіріледі», — деді «Integra Construction KZ» ЖШС бас директоры Мадияр Саттыбаев.
Жоба бойынша болашақ балаларды қолдау орталығы 180 орынға есептелген және бес блоктан тұрады. 18 шаршы метрлік бөлмелерде төрт адамнан орналасады, бұрын мұнда 6-8 тәрбиеленуші тұрған. Әр блок ас үй, кір жуатын бөлме және басқа да тұрмыстық үй-жайлармен жабдықталады.
Кешеннің жалпы ауданы 11 мың шаршы метрден асады. Ол 2,5 гектар жерге орналасып, негізгі ғимараттарға шамамен 1,2 гектар бөлінеді. Қалған аумақты абаттандырып, қосымша ғимараттар салу жоспарланған, соның ішінде спорт орталығы да бар.
Құрылыс 2026 жылдың қыркүйек айының соңына дейін аяқталады. Қазір алаңда 30-ға жуық жұмысшы және үш ондаған техника жұмыс істеп жатыр. Монолитті жұмыстар басталғанда мамандар саны екі есе артады. Сонымен қатар дизайнерлер интерьер шешімдерін әзірлеп жатыр.
Жоба құрылыс салушының меншікті қаражаты есебінен қаржыландырылады — оған шамамен 5 млрд теңге бөлінген. Жобалау кезінде сейсмикалық және өрт қауіпсіздігі талаптары ескерілген. Төбенің биіктігі үш метрге дейін ұлғаяды (бұрын 2,6 м болған).
Дереккөз: Inform.kz