Алматының Түрксіб ауданында бұрынғы бос жерге скейтбординг алаңы бар саябақ салынды, деп хабарлайды Almaty.news ақпарат агенттігі.
Қала әкімдігінің баспасөз қызметінің мәліметінше, «Жас Қанат» шағын ауданында «Халық қатысатын бюджет» бағдарламасы аясында қоғамдық аумақты абаттандыру жұмыстары аяқталды.
Бұрынғы бос жерде серуендеу жолдары, жасыл аймақтар және скейтбординг алаңы пайда болды.
«Жұмыс барысында 20 мың шаршы метрден астам аумақ көгалдандырылды, шамамен 6 мың шаршы метр тротуар плиткасы төселді, асфальттау жұмыстары жүргізіліп, резеңке жабынды учаскелер жабдықталды», — деп мәлімдеді әкімдікте.
Сонымен қатар саябақта 53 жарықтандыру тірегі, декоративті жарық құрылымдары, орындықтар, қоқыс жәшіктері және шағын сәулет нысандары орнатылды.
Серуендеу аймағы перголамен және автоматты суару жүйесімен жабдықталған.
Жаңартылған аумақ шағын аудан тұрғындарының серуендеуіне, демалысына және спортпен шұғылдануына арналған.