Алматының Медеу ауданында 45 мың орындық жаңа футбол стадионын салу жоспарлануда, деп хабарлайды Almaty.news ақпарат агенттігі.
Мәслихаттың кезекті сессиясында депутат Елена Те әкім орынбасарына екі жобаның іске асырылуына қатысты сұрақ қойды. Ол «Медеу» мұз айдынын қайта жаңарту және қалада жаңа стадион салу жобаларында нақты проблемалар бар ма, мердігерлер өз міндеттемелерін қаншалықты сапалы орындап жатыр және жұмыстардың болжамды аяқталу мерзімдері қандай екенін сұрады.
Қала әкімінің орынбасары Бейбіт Шаханов бұл жобалардың Алматы үшін ғана емес, бүкіл ел үшін маңызды екенін атап өтті.
— Өнеркәсіп және құрылыс министрінің бұйрығымен стадион бірегей нысандар қатарына жатқызылды. Оны іске асыру үшін Құрылыс істері комитеті жеке жоспар бекітті, біз соған сәйкес жұмыс істеп жатырмыз. Бұл жобаны Қазақстан футбол федерациясымен, УЕФА-мен және «Қайрат» футбол клубымен келісеміз, болашақта осы стадионда еуропалық турнирлерді өткізуге үміткер бола аламыз. Бірақ бізде сейсмикалық белсенділік жоғары, стадион салынып жатқан учаске 10 балдық аймаққа жатады. Сондықтан бұл жобаны ҚазҚҒЗИҚА-мен пысықтаймыз. Қазіргі уақытта сынақ қадаларын қағу жүргізілуде. Осы сынақтар аяқталғаннан кейін іргетас бойынша жұмысты жалғастырамыз. Бұл жоба ерекше маңызды, ол ерекше бақылауда. Алдын ала оны 2028 жылдың наурызында аяқтауды жоспарлап отырмыз, — деді ол.
Бейбіт Шаханов «Медеу» мұз айдынын қайта жаңартуға қатысты нысанның тарихи және сәулет ескерткіші екенін, сондықтан жоба Мәдениет министрлігімен және Қазреставрациямен келісілетінін, қазір қажетті ғылыми сараптамаларды алу бойынша белсенді жұмыс жүргізіліп жатқанын атап өтті.
— Біз 2027–2028 жылдардағы маусымға қарай «Медеу» қонақтар мен туристерді қабылдайды деп есептейміз, — деп атап өтті әкім орынбасары.
Бұған дейін стадион Күлжа трактісі ауданында орналасып, УЕФА-ның IV санатының талаптарына сәйкес салынатыны хабарланған болатын. Жобада табиғи шөп жамылғысы бар футбол алаңы және мыңнан астам автокөлікке арналған тұрақ қарастырылған. Сондай-ақ құрылыс-монтаж жұмыстарын аяқтау мерзімі — 2027 жылдың төртінші тоқсаны деп хабарланған еді.
Еске сала кетейік, аңызға айналған «Медеу» мұз айдыны кең ауқымды жаңғырту үшін екі жылға жабылады. Кешенді қайта жаңарту тұжырымдамасы әзірленді. Жоба EPC-келісімшарты (Engineering, Procurement, Construction) форматында іске асырылып, 2025–2027 жылдар аралығын қамтиды.
Дереккөз: Inform.kz