Алматыдағы төрт қабатты үйдің тұрғындары көршісінің пәтері мен балконын қоқысқа айналдырғанына шағымдануда. Олардың айтуынша, бұл жағдай жәндіктердің пайда болуына және подъездегі санитарлық жағдайдың күрт нашарлауына әкелген, деп хабарлайды Almaty.news ақпарат агенттігі.
КТК телеарнасының мәліметінше, көршілердің сөзіне қарағанда, әйел көшеде бөтелкелер, пакеттер және басқа заттарды жинап, үйіне әкеліп, тұрғын үйді толығымен қоқысқа толтырған. Үй тұрғындарының бірі Ақбөпе Бәкірова пәтердегі қоқыс тек бөлмелерді ғана емес, балкон мен дәретхананы да басып қалғанын айтты. Оның сөзінше, пәтерде күшті иіс бар, ал балконға әйел тамақтандыратын құстар ұшып келеді.
Басқа тұрғындар зейнеткердің күн сайын үйге әртүрлі заттар мен пакеттер әкелетінін байқайды. Сондай-ақ подъезде тарақандар мен қандалалар пайда болғанын хабарлайды.
Көршілердің айтуынша, 62 жастағы әйел шамамен бір жыл бойы толық антисанитария жағдайында тұрып жатыр және іс жүзінде ешкіммен араласпайды. Оның туыстары жоқ.
Тұрғындар өрт, газ жарылуы және инфекцияның таралу қаупіне алаңдап отыр, алайда әйел пәтерге кіргізбейді, тіпті учаскелік полиция қызметкеріне де есік ашпаған.
Алатау ауданы әкімдігі жағдайды шешу үшін тұрғындарға ұжымдық өтініш жіберу қажет екенін хабарлады. Одан кейін ТЖД, санитарлық қызмет, полиция және әкімдік өкілдерінен комиссия құрылады. Мамандар тұру жағдайын тексеріп, әйелдің есепте тұрған-тұрмағанын және әлеуметтік көмекке мұқтаж екенін анықтайды.
Дереккөз: Inalmaty.kz