Алматыда велосипед инфрақұрылымының желісін кеңейту жалғасуда. Қалада жаңа веложолдар мен веложолақтар салу үшін көлік схемалары әзірленіп, жалпы ұзындығы 48 шақырымнан асатын қосымша учаскелер қарастырылуда. Бұл туралы «Алматы қаласы жол қозғалысын ұйымдастыру орталығы» ЖШС-нің Kazinform агенттігінің сауалына берген ресми жауабында айтылған, деп хабарлайды Almaty.news ақпарат агенттігі.
Ұйымда хабарланғандай, абаттандыру жобалары аясында қаланың тоғыз көшесінде велоинфрақұрылымды ұйымдастыруды ескере отырып, көлік схемалары әзірленген. Атап айтқанда, велоинфрақұрылым мына көшелерде қарастырылған: Назарбаев даңғылы — Төле би көшесінен Ганди көшесіне дейін (2,4 км); Мендіқұлов бульвары (0,6 км); Жолдасбеков көшесі (0,7 км); Сәтбаев көшесі (2,5 км); Жароков көшесі (1,8 км); Тимирязев көшесі (1,1 км); Масанчи көшесі (0,8 км); Жандосов көшесі (0,4 км). Осылайша, жобаланған учаскелердің жалпы ұзындығы шамамен 16,9 шақырымды құрайды. Сонымен қатар, Алматыда тағы жеті учаскеде велоинфрақұрылым құру мүмкіндігі қарастырылуда. Тізімге Ганди, Қозыбаев, Манас, Брусиловский, Шевченко, Майборода көшелері, сондай-ақ әл-Фараби даңғылының учаскесі енгізілген.
Жол қозғалысын ұйымдастыру орталығында түпкілікті шешім көше-жол желісін талдау және көлік схемаларын әзірлеуден кейін қабылданатынын атап өтті. «Учаскелер қауіпсіз орналастыру тұрғысынан талданып, тексерілетін болады. Бір бөлігі веложолақ, бір бөлігі веложол ретінде іске асырылады. Сондай-ақ велосветофорлар, қиылыстар арқылы велоөткелдер, жол белгілері және бөлу бордюрі бар буферлік аймақ қарастырылады. Жарықтандыру абаттандыру жобасында көзделген», — делінген агенттік сауалына берілген жауапта.
Бір мезгілде велосипед желісін дамыту жаңа жолдар салу аясында да қарастырылған. Алматы жол инфрақұрылымын дамыту басқармасының мәліметінше, биылғы жылы үш көшенің жалғасын аяқтау жоспарланған, онда да веложолдар пайда болады: Төле би көшесі — Яссауи көшесінен қала шекарасына дейін (9 км); Абай даңғылы — Әуезов көшесінен Қалқаман шағынауданындағы қала шекарасына дейін (1,2 км); Сайын көшесі — Рысқұлов даңғылынан Ақын Сара көшесіне дейін (6,4 км). Сонымен қатар, Райымбек батыр даңғылы бойынша BRT желісін салу кезінде тағы 15 шақырымға жуық велоинфрақұрылым жабдықтау жоспарлануда. Осылайша, жобаланған, салынып жатқан және жоспарланған жобаларды ескере отырып, Алматыдағы жаңа велосипед инфрақұрылымының жалпы ұзындығы 48 шақырымнан асуы мүмкін. Бұл ретте бағыттардың бір бөлігі бөлек веложолақтар, ал бір бөлігі қауіпсіздік элементтері мен жеке реттеуі бар толыққанды веложолдар түрінде орындалатын болады.
Дереккөз: Inform.kz