Алматыда «Үздік тауар – 2026» өңірлік байқау-көрмесі өтіп, отандық 60-тан астам өндірушіні біріктірді. Іс-шара қазақстандық кәсіпорындардың жетістіктерін көрсету, тәжірибе алмасу және жергілікті өндірушілердің өнімдерін ілгерілету алаңына айналды, деп хабарлайды Almaty.news ақпарат агенттігі.
Ашылу салтанатына Алматы қаласы әкімінің орынбасары Олжас Смағұлов және «Атамекен» Алматы қаласы кәсіпкерлер палатасының директоры Шыңғысхан Маманов қатысты. Олар отандық өндірушілерді мемлекеттік қолдау, өнім сапасын арттыру және бәсекеге қабілетті бизнесті дамытудың маңыздылығын атап өтті.
Күн ішінде қатысушылар Алматыда өндірілген тауарлардың кең ассортиментін ұсынды, ал конкурстық іріктеу қорытындысы бойынша үш номинацияда жеңімпаздар анықталды.
«Үздік азық-түлік тауарлары» номинациясында бірінші орынды «Qulpynai Production» ЖШС, екінші орынды «Камертон» компаниясы ЖШС, үшінші орынды «ЛОТТЕ Рахат» АҚ иеленді.
«Үздік өндірістік мақсаттағы тауарлар» санатында «БСФ» ЖШС жеңімпаз атанды. Екінші орын «Bakarassov» концерні ЖШС-ке, үшінші орын «СК Рахат» ЖШС-ке берілді.
«Халыққа арналған үздік тауарлар» номинациясында бірінші орынды «Қазақстандық Құбыр Жүйелері» ЖШС, екінші орынды «Жигалма» ЖШС, үшінші орынды «Hyundai Trans Kazakhstan» ЖШС жеңіп алды.
Өңірлік кезеңнің жеңімпаздары Алматыны «Үздік тауар – 2026» республикалық байқауында таныстырып, еліміздің үздік өндірушілері атану үшін сынға түседі.
Дереккөз: Almaty.tv