Алматыда 3000-ға жуық велосипедші қатысатын түнгі велошеру өтеді. Осыған байланысты қаланың бірнеше орталық көшесінде қозғалыс уақытша шектеледі, деп хабарлайды Almaty.news ақпарат агенттігі.
Telegram-арнасы AlmatyJoly мәліметінше, 21:45-тен 23:00-ге дейін Назарбаев даңғылы мен Желтоқсан көшесінде екі бағытта да уақытша шектеу енгізіледі. Бұл шаралар велошеру қатысушыларының колоннасы өткен кезде қолданылады.
Велошерудің старты Астана алаңынан сағат 22:00-де беріледі. Маршрут орталық көшелермен өтеді: Төле би көшесі – Назарбаев даңғылы – Тимирязев көшесі (Алматы қаласы әкімдігі ғимаратының тұсы) – Желтоқсан көшесі – Төле би көшесі.
Қатысушылар үшін неонды жарықтандыру элементтері, ойын-сауық бағдарламасы, конкурстар және интерактивті іс-шаралар дайындалған.
Қала тұрғындары мен қонақтарына жол жүру бағыттарын алдын ала жоспарлап, уақытша шектеулерге түсіністікпен қарау ұсынылады.
Сонымен қатар, Астанадағы маңызды магистральдардың бірі – Тұран даңғылының бойындағы учаске 22-24 мамыр 2026 жылы жөндеу жұмыстарына байланысты толығымен жабылады.
Дереккөз: Zakon.kz