Алматыда 25 маусымнан бастап Алмалы ауданының бірнеше көшесінде қозғалыс схемасы өзгереді. Үш учаскеде пилоттық режимде біржақты қозғалыс енгізіледі, деп хабарлады қалалық әкімдіктің баспасөз қызметі, деп хабарлайды Almaty.news ақпарат агенттігі.
Жаңа схема бойынша Прокофьев көшесінде Абай даңғылынан Кіші Абай көшесіне дейінгі учаскеде солтүстік бағытта біржақты қозғалыс енгізіледі. Кіші Абай көшесімен көлік тек шығыс бағытта, Прокофьев көшесінен Брусиловский көшесіне дейін жүреді. Сондай-ақ Түркебаев көшесінде Сәтбаев көшесінен Төле би көшесіне дейінгі учаскеде солтүстік бағытта біржақты қозғалыс енгізіледі.
«Өзгерістер Алматы әкімшілік полиция басқармасымен бірлесіп іске асырылады. Жаңа енгізілімдердің негізгі мақсаты – жолдардың өткізу қабілетін арттыру, көлік жүктемесін азайту және жол бөлігіндегі қақтығыс жағдайларының санын кеміту», – деп атап өтті ведомствода.
Шешім жол жағдайын талдау қорытындысы бойынша және аудан тұрғындарының өтініштерін ескере отырып қабылданды. Жаңа схема қозғалысты ретті және қауіпсіз етеді деп күтілуде. Біржақты қозғалыс пилоттық режимде енгізіледі. Көлік жағдайын мониторингтеуден кейін мамандар өзгерістердің тиімділігін бағалап, жол қозғалысын ұйымдастыру бойынша одан әрі шешімдер қабылдайды.
Бұған дейін осындай шаралар Медеу ауданында: Достық даңғылының Гоголь көшесінен Жібек жолы даңғылына дейінгі учаскесінде және Зенков көшесінің Мақатаев көшесінен Гоголь көшесіне дейінгі учаскесінде енгізілген болатын. Сонымен қатар, Әуезов ауданындағы Атамекен көшесінің бір учаскесінде біржақты қозғалыс қазірдің өзінде жұмыс істейді.
Дереккөз: Inalmaty.kz