Алматыда сел қауіпті учаскелердің тәулік бойы мониторингі жалғасуда. ТЖМ деректері бойынша, қаладағы гидрологиялық жағдай тұрақты болып қалуда, өзендердегі су деңгейінің көтерілуі тіркелмеген, деп хабарлайды Almaty.news ақпарат агенттігі. Алдын алу шаралары аясында ТЖМ қызметкерлері жергілікті атқарушы органдармен бірлесіп, Ақсай өзенінің арнасын қорғаныс бөгетінің маңында нығайту және тазарту жұмыстарын аяқтады. Жүргізілген жұмыстардың арқасында өзендегі су деңгейі айтарлықтай төмендеді.
Бүгінгі күні мамандар мореналық көлдер мен өзен бассейндеріне аэровизуалды зерттеу жүргізуді жоспарлады. Сонымен қатар Үлкен Алматы және Кіші Алматы өзендерінің бассейндеріне үздіксіз мониторинг жүргізілуде.
Жағдайды бақылау үшін мониторингтік бекеттерде Алматы қаласы ТЖД, Құтқару қызметі, «Барыс» Республикалық жедел-құтқару жасағы, ТЖМ «Қазселденқорғау» және Полиция департаментінің 130-дан астам қызметкері мен 20 бірлік техникасы жұмылдырылған.
ТЖМ жағдайдың тұрақты бақылауда екенін атап өтті.
Дереккөз: Inalmaty.kz