Алматы полициясы арнайы операция жүргізіп, нәтижесінде «күлдіргіш газ» сақталған ірі қоймаға шықты, деп хабарлайды Almaty.news ақпарат агенттігі Nur.kz-ке сілтеме жасап.
Алматы полиция департаментінің баспасөз қызметінің мәліметінше, мегаполис полицейлері ірі арнайы операция өткізген. Жедел-іздестіру іс-шаралары барысында Алматының есірткі қылмысына қарсы күрес басқармасының қызметкерлері азот тотығы бар баллонды тасымалдаған курьерді ұстаған.
«Кейін жеделшілер жеткізудің болжамды тізбегін анықтап, заттың ірі партиялары сақталған қоймаға шықты. Жүргізілген іс-шаралар нәтижесінде заңсыз айналымнан әртүрлі көлемдегі 685 баллон, сондай-ақ оларды толтыруға арналған жабдық алынды», — делінген ДП хабарламасында.
Аталған факті бойынша қылмыстық іс қозғалған. Полицейлер күшті әсер ететін заттың заңсыз айналымын ұйымдастыруға қатысы бар барлық адамдарды, сондай-ақ оны жеткізу және өткізу арналарын анықтауда.
Дереккөз: Nur.kz