Алматыда 4 қазаннан бастап парковка құны өзгереді: енді баға тұрақтың орналасқан аймағына байланысты болады, деп хабарлайды Almaty.news ақпарат агенттігі.
Қазіргі уақытта парковка сағатына 100 теңге тұрады, бұл тариф 2016 жылдан бері өзгермеген. Осы уақыт ішінде Алматыдағы көлік саны 1 миллионнан асып, жолдар мен тұрақтарға жүктеме артты.
Жаңа тарифтер үш аймаққа бөлінеді:
- 100 теңге/сағат – жүктемесі аз учаскелерде;
- 150 теңге/сағат – орташа жүктемесі бар аймақтарда;
- 200 теңге/сағат – тұрақ орындары жетіспейтін ең сұранысқа ие учаскелерде.
Қалалық басқарманың мәлімдеуінше, өзгерістердің басты мақсаты – тұрақ орындарын қолжетімді ету. Жүргізушілер бос орын іздеуге көп уақыт жұмсайды, бұл жолдардағы жүктемені де арттырады.
Айта кету керек, ақылы тұрақтарға жақын орналасқан үйлердің тұрғындары үшін тұрғылықты жері бойынша тегін парковка сақталады. Тұрғын үй иелері үйінің жанындағы таңдаған тұрақта бір көлікті тегін қоюға рұқсат ала алады.
Сондай-ақ жекелеген санаттағы пайдаланушылар үшін жеңілдіктер жалғасады.
Билік өкілдері жаңа тарифтер тұрақ іздеу уақытын қысқартып, тоқтау және тұрақ ережелерін бұзу санын азайтып, тұрақ орындарын тиімдірек пайдалануға көмектеседі деп күтеді.