Ақмола облысының тұрғыны Алматыда пәтер жалдауға ниеттеніп, алаяқтықтың құрбаны болды. Ол қаражаттан да, баспанадан да айырылып қалды, деп хабарлайды Almaty.news ақпарат агенттігі.
Облыстық полиция департаментінің Instagram парақшасында жарияланған ақпаратқа сәйкес, 36 жастағы жергілікті тұрғын құқық қорғау органдарына жүгінген. Ол Алматыдан жалға пәтер іздеу барысында алданып қалғанын мәлімдеген. Аймақта осыған ұқсас үш дерек тіркелгені белгілі болды.
«Зардап шеккен әйел OLX платформасынан Алматыдағы пәтерді жалға беру туралы хабарландыруды тапқан. Ұсынылған нұсқа оған ұнады, содан кейін ол WhatsApp арқылы жалға берушімен байланысып, алдын ала төлем жасаған. Кейін әйел хат алмасудың жойылғанын, ал хабарландыруды орналастырған адамның байланысқа шығуды тоқтатқанын байқаған. Алдын ала төлем сомасы салыстырмалы түрде аз болғанымен, зардап шеккен әйел үшін ол елеулі болды», — деді полицияда.
Жедел-іздестіру іс-шаралары барысында тәртіп сақшылары кінәсін мойындаған 31 жастағы жергілікті тұрғынды анықтады.
«Қазіргі уақытта болған оқиғаның барлық мән-жайы анықталып, күдіктінің басқа да осыған ұқсас эпизодтарға қатысы бар-жоғы тексерілуде», — деп қосты облыстық полиция департаментінде.
Полицейлер азаматтарды интернеттен баспана іздегенде сақ болуға шақырады: пәтердің бар екеніне және оны жалға ұсынып отырған адамның өкілеттігіне көз жеткізбейінше, алдын ала төлем жасауға болмайды.