Алматы әкімі Дархан Сатыбалды педагогтер қауымдастығын кәсіби мерекемен құттықтап, мемлекеттік наградаларды табыс етті, деп хабарлайды Almaty.news ақпарат агенттігі.
Ол қаланың білім беру жүйесінде 42 мыңнан астам педагог еңбек етіп жатқанын атап өтті. Алматы мұғалімдері қаланың көрнекті педагогтерінің дәстүрлерін жалғастыруда. Аягүл Төреқызы Миразова «Қазақстанның Еңбек Ері» деген жоғары атаққа ие болған алғашқы педагог. 2024 жылы бұл жоғары атақ №4 мектеп-интернаттың математика мұғалімі Гүлжанар Молдакерімқызы Нұрпейісоваға берілді. Бүгінгі таңда Алматының 16 педагогі «Қазақстанның еңбек сіңірген ұстазы» құрметті атағына ие.
Мемлекет алдындағы ерекше еңбегі мен білім беру саласындағы айтарлықтай жетістіктері үшін төрт алматылық педагог «Құрмет» орденімен марапатталды.
Мемлекеттік наградамен 53 жылдық еңбек өтілі бар Республикалық физика-математика мектебінің физика мұғалімі Сабыр Тұяқбаев; білім беру жүйесіне 50 жыл арнаған еңбек ардагері Тоқтар Абайлда; еңбек өтілі 37 жылды құрайтын №138 гимназияның бастауыш сынып мұғалімі Эльмира Әбдірасылова; білім беру саласында 33 жыл жұмыс істеп жүрген №7 арнайы мектеп-интернаттың мұғалім-логопеді Алма Сексенова марапатталды.
«Ерен еңбегі үшін» медалімен педагогикалық қызметке 47 жыл арнаған №87 жалпы білім беретін мектептің ағылшын тілі мұғалімі Наталья Зубенко марапатталды.
Тағы бес педагог қала әкімінің Алғыс хаттарын алды. Олардың қатарында «Алматы дарыны» орталығы бөлімінің меңгерушісі Жібек Сванбаева, №178 мамандандырылған лицей директорының орынбасары Гүлнафис Дәулетбаева, №136 мектеп-гимназияның қазақ тілі мен әдебиеті мұғалімі Нұргүл Жұманбек, №44 мектеп-гимназияның ағылшын тілі мұғалімі Сусанна Зейналова және №174 мектеп-гимназияның математика мұғалімі Дәмен Сағатбек бар.
Салтанатты рәсімнің жеке бөлігі жас педагогтер арасындағы «Алматы ұстазы – 2026» жыл сайынғы қалалық байқауының жеңімпаздарын марапаттау болды. Қаланың үздік жеті педагогі Қытайда халықаралық тағылымдамадан өту мүмкіндігіне ие болды. Олардың қатарында Алматы мектептерінің тарих, география, биология, қазақ тілі мен әдебиеті, физика, ағылшын тілі және химия мұғалімдері бар.
«Алматы ұстазы – 2026» байқауының Гран-при иегері №92 мамандандырылған лицейдің химия мұғалімі Мықтыбек Тәңірберген Бақытжанұлы атанды. Жеңімпазға 5 млн теңгеге сертификат және Қытайда халықаралық тағылымдамадан өту сертификаты табыс етілді.
Байқау финалына қаланың түрлі пән бағыттары мен мектептерін ұсынатын жеті педагог шықты. Жас мамандарды қолдау, мұғалім мамандығының беделін арттыру және педагогтердің кәсіби дамуы үшін мүмкіндіктер жасау Алматының білім беру жүйесінің басым бағыттарының бірі болып қала береді.