Алматыда LRT бірінші желісінің құрылысына дайындық жұмыстары жалғасуда, деп хабарлайды Almaty.news ақпарат агенттігі.
Қазіргі кезеңде негізгі жұмыстар Бауыржан Момышұлы мен Төле би көшелерінде шоғырланған. Мұнда трассаны дайындау және құрылыс аймағында орналасқан инженерлік коммуникацияларды қайта жаңарту жүргізілуде.
Жоба бойынша барлығы 375 инженерлік коммуникацияны қайта жаңарту көзделген. Олардың қатарына жылу желілері, байланыс желілері, сумен жабдықтау және кәріз жүйелері, нөсер кәрізі, газ және электр желілері кіреді.
Алматы әкімдігінің мәліметінше, Алматыда LRT бірінші желісін іске қосу 2027 жылдың соңына жоспарланған.
Алматыда LRT бірінші желісінің жобасы кезең-кезеңімен іске асырылуда, қазіргі уақытта ұзындығы 18,3 км учаскеде дайындық жұмыстары жүргізілуде — инженерлік коммуникацияларды шығару, қайта жаңарту және қорғау, сондай-ақ газ құбырын қайта жаңарту.
Еске салайық, Алматыдағы LRT депосы Алатау ауданында Фариза Оңғарсынова, Мөңке би және Бауыржан Момышұлы көшелерінің аралығында орналасады. Депоға жеңіл рельсті көлік желісі Момышұлы көшесімен оңтүстік бағытта Төле би көшесіне дейін, содан кейін Төле би бойымен шығысқа қарай Абылай хан даңғылына дейін өтеді. Әрі қарай бағыт солтүстікке бұрылып, Абылай хан даңғылымен Алматы-2 теміржол вокзалына дейін жалғасады.
Жобаны кім іске асыратыны және қанша қаражат бөлінгені туралы осы жерден оқыңыз.