Алматыдағы қалалық кардиологиялық орталықтың базасында еліміздегі алғашқы мамандандырылған қолқа орталығы ашылды. Мұнда аневризма және қолқа қабырғасының қабаттануы сияқты аса қауіпті аурулармен ауыратын науқастар емделеді. Көмек шұғыл және жоспарлы түрде көрсетіледі, деп хабарлайды Almaty.news ақпарат агенттігі.
Қазіргі уақытта кардиоорталық 18 бағыт бойынша жұмыс істейді. Тек 2025 жылы мұнда 11 000-ға жуық адам емделген, ал дәрігерлер жүрекке 500-ге жуық операция жасаған. Медиктердің айтуынша, қолқа патологиясы кезінде есеп минутқа жүреді. Жаңа орталық көмекті тезірек көрсетуге және заманауи емдеу әдістерін қолдануға мүмкіндік береді.
«Қолқа орталығын кардиохирургия бөлімшесінің құрамында құру қолқаның күрделі патологиясы бар науқастар санының үнемі өсуіне байланысты. Уақтылы диагностиканың арқасында мұндай науқастар көбейіп келеді, және мұндай жағдайларда шешімді барынша тез қабылдап, емдеу тактикасын анықтап, кідіріссіз мамандандырылған медициналық көмек көрсету қажет», — деді кардиоорталықтың директоры Ермағамбет Қуатбаев.
Соңғы жылдары орталықта жүрек трансплантациясы мен аз инвазивті кардиохирургияны қоса алғанда, бірқатар күрделі технологиялар енгізілген. 2025 жылы 11 000-нан астам операцияны жүргізуге 28 миллиард теңгеден астам қаражат бөлінген. Мамандардың айтуынша, кардиохирургия отандық медицинаның ең қымбат бағыттарының бірі болып қала береді. Сонымен қатар, операциялардың барлық түрі міндетті әлеуметтік медициналық сақтандыру жүйесі есебінен толық қаржыландырылады.
«Алматы тұрғындары міндетті әлеуметтік медициналық сақтандыру жүйесі аясында кардиохирургиялық операцияларды тегін жасата алады. Бүгінде қалада кардиохирургиялық көмек көрсететін 14 клиника жұмыс істейді, оның тоғызы – жеке меншік. Науқастар осы клиникалардың кез келгенін өздері таңдап, МӘМС бойынша қажетті емді тегін ала алады», — деп хабарлады Медициналық сақтандыру қоры филиалы бөлімінің басшысы Шынар Әлжанова.
Дереккөз: Almaty.tv