Дүниежүзілік қоршаған орта күніне орай Алматыдағы алғашқы қалалық экохабта «Эколог сағаты» экологиялық акциясы өтті, деп хабарлайды Almaty.news ақпарат агенттігі. Іс-шара Экология және қоршаған ортаны қорғау басқармасы мен «Eco Almaty» ЖШС қолдауымен ұйымдастырылды.
Акцияға қала тұрғындары, студенттер, ұйым өкілдері және экологиялық белсенділер қатысты. Қонақтар үшін қалдықтарды бөлек жинау бойынша шеберлік сабақтары, мамандардың кеңестері және күнделікті өмірде қолдануға болатын экологиялық әдеттер туралы танымдық дәрістер ұйымдастырылды.
Қатысушыларға қалдықтарды сұрыптау ережелері, пластиктің әртүрлі түрлерін қайта өңдеу ерекшеліктері және бір реттік бұйымдарды пайдалануды азайтудың маңыздылығы туралы айтылды. Экохаб мамандары қайта өңделген материалдардан жасалған бұйымдарды, оның ішінде жиһаз элементтері мен интерьер заттарын көрсетті.
Акция аясында тұрғындар мен ұйымдар қалдықтарды қайта өңдеуге тапсырды. Келушілердің ерекше қызығушылығын экологиялық өмір салтын қалыптастыру бойынша практикалық ұсыныстар тудырды: пластик пакеттердің орнына көп рет қолданылатын сөмкелерді, бір реттік ыдыстың орнына термостар мен су бөтелкелерін пайдалану және қалдықтарды азайтуға мүмкіндік беретін басқа да қарапайым шешімдер.
«Экологиялық мәдениет білім мен жеке тәжірибе арқылы қалыптасады. Мұндай іс-шаралар тұрғындарға қалдықтарды бөлек жинау принциптерімен тәжірибе жүзінде танысуға, қайта өңдеу мүмкіндіктері туралы білуге және қалдықтардың пайдалы бұйымдарға айналуын көруге мүмкіндік береді. Дәл осындай қадамдардан қоршаған ортаға жауапкершілікпен қарау басталады», — деп атап өтті Eco Network компаниясының операциялық директоры Хамза Сафаров.
Ұйымдастырушылардың айтуынша, күн ішінде алаңға мыңға жуық адам келген. Сонымен қатар, акция аясында тұрғындар мен ұйымдар қалдықтарды қайта өңдеуге әкеліп, қала тұрғындарының экология және жауапты тұтыну мәселелеріне деген қызығушылығының артып келе жатқанын көрсетті.
Дереккөз: Almaty.tv