Алматыда кенеге қарсы ауқымды өңдеу жұмыстары жалғасуда, деп хабарлайды Almaty.news ақпарат агенттігі.
Дезинсекцияның бірінші кезеңі 26 наурыздан 30 сәуірге дейін өтіп, 2366 гектардан астам аумақты – орман алқаптарын, қалалық саябақтар мен скверлерді қамтыды.
Екінші кезең 6 мамырда басталды. 17 мамырға қарай 661 гектардан астам жер өңделді, бұл жалпы жоспардың шамамен 28 пайызын құрайды.
Ең ірі аумақтар Медеу ауданында өңделуде – мұнда шамамен 1469 гектарды, оның ішінде Медеу, Бутаковка, Көлсай, Сұлусай шатқалдары мен басқа да табиғи аймақтарды қамту жоспарланған.
Бостандық ауданында кенеге қарсы іс-шаралар Алма-Арасан шатқалы мен қалалық саябақтарда жүргізілуде. Алатау, Алмалы, Әуезов, Бостандық, Медеу, Наурызбай және Түрксіб аудандарындағы саябақтар мен скверлерді өңдеу аяқталды.
– Бүгін орман алқаптарын өңдеу ауа райы жағдайларын ескере отырып жалғасуда – жұмыстар тек құрғақ және жаңбырсыз ауа райында жүргізіледі. Өңдеуден кейін мамандар аумақтарды іріктеп тексереді. Өңделген учаскелерде кенелер табылған жоқ. Бұл жүргізіліп жатқан іс-шаралардың тиімділігін растайды, – деді «Алматы қаласы бойынша дезинфекция орталығының» директоры Айнұра Аққошқарова.
Маусым бойы төрт бақылау бағытында – Бутаковка, Медеу, Алма-Арасан және Қарағайлы шатқалдарында энтомологиялық мониторинг жүргізіледі.
Маусым басынан бері табиғи жағдайда 41 кене ауланды. Бір жұқтырылған дарақ Бірінші Президент саябағының аумағында табылды. Сонымен қатар, Сараптама ұлттық орталығы филиалының зертханасы 187 кенені, оның ішінде адамдардан алынғандарын зерттеді. Олардың арасынан төрт жұқтырылған кене анықталды.
Мамандар тауда, орманда, саябақтар мен скверлерде серуендеу кезінде сақтық шараларын сақтау қажеттігін еске салады. Тұрғындарға жабық ашық түсті киім киюге, репелленттерді қолдануға және табиғатта болғаннан кейін киім мен денені мұқият тексеруге кеңес береді.
Кене жабысып қалған жағдайда, шаққаннан кейін төрт күннен кешіктірмей медициналық көмекке жүгіну қажет. Алматыда шұғыл көмекті бес травматологиялық пункт, оның ішінде Балалар шұғыл медициналық көмек орталығы көрсетеді.
Бұған дейін Алматыда кене шағудан кейін жүгінушілер санының өскені хабарланған болатын, эпидемиологтар себепті аймақтағы ерте жылыну деп атайды. Кене шағудан кейін медициналық көмекке 2023 адам жүгінген.
Дереккөз: Inform.kz