Алматыда тұрғын үй кешенінің аумағында балаға күш қолданған ер адам ұсталып, қамауға алынды. Оқиға балалар алаңында болып, бейнебақылау камераларына түсіп қалған, деп хабарлайды Almaty.news ақпарат агенттігі.
Полиция мәліметінше, күдікті осы тұрғын үй кешенінің тұрғыны. Алдын ала деректер бойынша, оқиғаға балалардың ойын кезіндегі жанжалы себеп болған. Ер адам өз бетінше араласып, балалардың бірін итеріп жіберген, нәтижесінде бала дене жарақатын алған.
«Балаларға қатысты кез келген құқыққа қайшы әрекет, себеп-салдарына қарамастан, қатаң құқықтық баға алады», — деп мәлімдеді Алматы полициясы.
Дене жарақатын келтіру фактісі бойынша қылмыстық іс қозғалып, күдікті қамауға алынды. Қазіргі уақытта полиция қызметкерлері оқиғаның барлық мән-жайын анықтау үшін қажетті тергеу амалдарын жүргізіп жатыр.
Дереккөз: Nur.kz