Алматыда полиция қызметкерлері есірткі сақтаған әйелді ұстады, одан шамамен 2,5 кг есірткі заты және 200 орама алынды, деп хабарлайды Almaty.news ақпарат агенттігі.
Есірткі қылмысына қарсы күрес басқармасының жедел уәкілдері оны Түрксіб ауданында ұстады. Жеке тексеру кезінде әйелден ұялы телефон табылды. Негізгі заттай дәлелдемелер автокөліктен анықталды.
Ол жерден полицейлер зат салынған 50 ораманы, сондай-ақ ұнтақ тәрізді зат салынған бірнеше ірі ораманы тәркіледі. Тәркіленген заттардың жалпы массасы шамамен 2,5 кг құрады.
Сонымен қатар, автокөліктен зип-пакеттер мен изолента табылды, олар заттарды орау және одан әрі сатуға дайындау үшін қолданылған болуы мүмкін.
Ұсталғаннан кейін әйел бұрын жасалған тайниктердің орнын көрсетті. Нәтижесінде жедел уәкілдер есірткі заты болуы мүмкін тағы 150 ораманы тауып, тәркіледі.
Алдын ала мәліметтер бойынша, ұсталған әйел есірткінің заңсыз айналымына қатысқан. Оның рөлі ірі партияларды қабылдау, сақтау, орау және кейіннен курьерлерге беру үшін «мастер-кладтар» дайындау болды.
Тәркіленген заттар сот сараптамасына жіберілді. Осы факті бойынша қылмыстық іс қозғалды.
Еске салайық, тамыз айында Алматы әуежайында көлік полициясы Қазақстанға есірткі заттарын аса ірі мөлшерде әкелудің үш әрекетінің жолын кескен еді.