2026 жылдың алғашқы төрт айында Алматыда вирустық А гепатитінің 21 жағдайы тіркелді. Өткен жылдың осы кезеңімен салыстырғанда сырқаттанушылық 3,3 есеге төмендеді, деп хабарлайды Almaty.news ақпарат агенттігі.
Вирустық А гепатиті — бауырдың жедел инфекциялық ауруы, ол фекальді-оральді жолмен беріледі. Инфекция көзі — ауру адам, ал жұқтыру ластанған тағамдар, су, тұрмыстық қарым-қатынас және жеке гигиена ережелерін сақтамау арқылы жүреді. Мамандардың айтуынша, вирус сыртқы ортаға төзімді және ұзақ уақыт сақталады.
Эпидемиологтардың дерегінше, Алматыда ауырғандардың 33,3%-ы — 14 жасқа дейінгі балалар, 4,7%-ы — жасөспірімдер, ал 61,9%-ы — ересектер. Сауалнама барысында жұқтырудың негізгі факторлары — жуылмаған көкөністер мен жемістерді тұтыну, жеке гигиенаны сақтамау, сондай-ақ контактілі-тұрмыстық жол екені анықталды.
Аурудың инкубациялық кезеңі 7 күннен 50 күнге дейін, орта есеппен 35 күн. Ауру интоксикация, диспепсиялық бұзылулар және сарғаю белгілерімен өтуі мүмкін.
Дәрігерлер ең тиімді қорғаныс әдісі — вакцинация екенін атап өтеді. А гепатитіне қарсы екпелер 2 және 2,5 жастағы балаларға, сондай-ақ эпидемиологиялық көрсеткіштер бойынша 14 жасқа дейінгі байланыста болған балаларға емханаларда тегін жүргізіледі.
Эпидемиологтар қарапайым профилактика шараларын сақтауға кеңес береді: қолды мұқият жуу, тек қайнатылған немесе бөтелкедегі суды тұтыну, көкөністер мен жемістерді мұқият өңдеу, ластанған су айдындарында шомылудан аулақ болу және үй-жайларды тұрақты дезинфекциялау. Ауру белгілері пайда болған жағдайда мамандар уақытылы медициналық көмекке жүгінуге және өзін-өзі емдеумен айналыспауға шақырады.
Дереккөз: Inalmaty.kz